Mədəniyyət


Azərbaycanlı rejissorun layihəsi Hollandiyada qalib oldu

İlk dəfə olaraq Azərbaycanlı rejissorun kinolayihəsi Rotterdam kino festivalının nəzdindəki Hubert Bals Fondu kinolayihələr müsabiqəsinin qalibi olub.

Oxu.Az-ın Kulis.az-a istinadla verdiyi xəbərə görə, rejissor Elvin Adıgözəlin “Yaşar” kinolayihəsi qalib olan doqquz layihədən biri seçilib. Müsabiqədə 315 layihə yarışıb. Qaliblər öz ssenarilərinin yazılması üçün maliyyə mükafatı alacaqlar. Bu, həm də layihənin Avropa kino mütəxəssislərinin diqqətini cəlb etməsi deməkdir.

“Yaşar” kinolayihəsi ən yaxın adamlarla belə dil tapa bilməyən yaşlı bir adamın hekayəsindən bəhs edəcək Azərbaycan və Fransanın ortaq işidir. Layihə bundan əvvəl İstanbul beynəlxalq kinofestivalında qalib olub.

Xatırladaq ki, rejissorun Rüfət Həsənovla birgə çəkdiyi  “Buqələmun” filmi 66-cı Lokarno kino festivalının müsabiqə proqramında iştirak etmişdi. Film 10-a yaxın nüfuzlu festivalda nümayiş olunub.

Həmçinin, müstəqil kinolayihələrdən başqa, rejissor tamaşaçılara müstəqil teatr layihələri - tamaşalar təqdim etmişdi. 

Dosye.az

Şövkət Ələkbərovanın anadan olmasından 95 il ötür

Bu gün Azərbaycanın unudulmaz sənətkarı Şövkət Ələkbərovanın anadan olmasından 95 il ötür.

Oxu.Az xəbər verir ki, Ş.Ələkbərova 1922-ci il oktyabrın 20-də Bakıda anadan olub.

O, Asəf Zeynallı adına Musiqi Məktəbində Hüseynqulu Sarabskinin sinfini bitirdikdən sonra səhnə yaradıcılığına başlayıb.

1938-1945-ci illərdə Azərbaycan Dövlət Mahnı və Rəqs Ansamblının solisti olub. 1945-ci ildən etibarən Azərbaycan Dövlət Filarmoniyasının solisti işləyib.

1937-ci ildə bədii özfəaliyyət kollektivlərinin müsabiqəsində iştirak edib və öz çıxışı ilə Üzeyir Hacıbəyov, Səid Rüstəmov, Bülbül kimi sənətkarların diqqətini cəlb edə bilib. Opera Teatrında keçirilən yekun konsertdə Şövkət Ələkbərova “Qarabağ şikəstəsi”ni ifa edib, Fatma Mehrəliyeva və Gülağa Məmmədovla birlikdə ilk üçlüyə daxil olub. Bu müsabiqə Şövkət Ələkbərovanın peşəkar musiqi sənətinə gəlişinin əsasını qoyub.

1945-ci ildən Filarmoniyanın solisti kimi işə başlayan Ş.Ələkbərovanın ifasında səslənən xalq mahnıları, muğamlar, bəstəkar mahnıları Azərbaycanda çox böyük məşhurluq qazanıb.

O, Fransa, İsveçrə, Şri-Lanka, Əfqanıstan, Hindistan, Misir, Əlcəzair, İran, Türkiyə, Polşa və digər xarici ölkələrdə uğurla çıxış edib. Şövkət Ələkbərovanın repertuarındakı “Segah”, “Qatar”, “Şahnaz” kimi muğamlar, Azərbaycan bəstəkarlarının və Orta Şərq xalqlarının mahnıları milyonlarla insan tərəfindən sevə-sevə dinlənilib.

Ş.Ələkbərova fevralın 7-si 1993-cü ildə dünyasını dəyişib.

Dosye.az

Əməkdar artist işdən çıxarıldı

Əməkdar artist Ayşad Məmmədov Akademik Milli Dram Teatrındakı işindən azad olunub.

Oxu.Az-ın APA-ya istinadla məlumatına görə, aktyor işdən öz ərizəsi əsasında çıxarılıb.

“Aktyor bu barədə teatr rəhbərliyinə müraciət edib və rəhbərlik onun istəyini qəbul edib. Ayşad Məmmədovla bağlanmış əmək müqaviləsinə xitam verilib”, - deyə teatrdan bildirilib.

Xatırladaq ki, Ayşad Məmmədov Milli Şuranın son mitinqində iştirak etmişdi və onun işdən çıxarılmasının bununla bağlı olduğunu deyilir.

Dosye.az

Direktordan Rövşanə Bektaşiyə cavab: Bu adamın teatrdan xəbəri yoxdur

“Bu adamın teatrın fəaliyyətindən, repertuarından, tarixindən heç xəbəri yox imiş. Çox təəssüf edirəm ki, bu gün jurnalist, aparıcı Azərbaycan teatrının tarixini bilmədən bu şəkildə danışır. Gənc Tamaşaçılar Teatrı Azərbaycan teatr tarixinə neçə-neçə böyük sənətkarlar bəxş edib və bu gün də bu proses davam edir. Teatrımızın 250-dən çox heyəti var. Bu qədər heyəti olan teatra necə “balaca” demək olar axı?!”

Bunu Report-a açıqlamasında aparıcı Rövşanə Ağasəfqızının (Bektaşi) "ARB TV"-də yayımlanan “Səhər-səhər” verilişində işlətdiyi fikirlərə münasibət bildirən Azərbaycan Dövlət Gənc Tamaşaçılar Teatrının direktoru Mübariz Həmidov deyib.

O qeyd edib ki, bəzi insanlar teatrları belə düşünülməmiş sözlərlə nəzərdən salırlar: “Mən xəbərləri saytlardan oxudum.  Bu, Azərbaycan mədəniyyətidir, peşəkar milli teatrımızın ayrılmaz bir qoludur. İstər Şuşa Dövlət Musiqili Dram Teatrı olsun, istərsə də İrəvan Dövlət Azərbaycan Dram Teatrı. Azərbaycandakı məcburi köçkün teatrlarının dünyada analoqu yoxdur, bu teatrlar yaşamalıdır. Burada çalışan insanlar fədakardırlar ki, belə bir vəziyyətdə bu teatrları yaşadıblar. Bu adamın teatrın fəaliyyətindən, repertuarından, tarixindən heç xəbəri yox imiş. Belə fikirlərə qəti şəkildə etiraz edirik. 10 milyonluq xalqının qarşısına çıxıb belə sözlər söyləmək, bilmirəm, nəyə qulluq edir. Bu, çox düşünülməmiş fikirlərdir. Qaldı ki, “teatra hərə bir sənət gətirir” sözünə, sənəti gətirmirlər, sənəti yaradırlar, yaşadırlar. Onu yaradanlar fədakar insanlardır, onlara dəstək olmaq lazımdır, belə sözlər demək lazım deyil”.

Qeyd edək ki, Şuşa Dövlət Musiqili Dram Teatrının direktoru Yadigar Muradov Rövşanə Ağasəfqızını “Qaçqın teatrlar nəyə lazımdır, bağlansınlar” fikirlərinə görə tənqid edib. Bu zaman aparıcı deyib ki, bu, onun şəxsi fikridir: “Niyə biz tənqidə açıq deyilik? Yenə də fikrimdə qalıram. Düşünürəm ki, balaca-balaca teatrlardansa, onu böyük etsinlər. Nəyə lazımdı bu cıqqılı teatrlar? İrəvan, Gənc Tamaşaçılar, Şuşa tetarları nəyə lazımdır? Yerindən duran ora sənət gətirir, biz də xəcalət çəkirik. Şuşa Teatrı nə edir?”

Dosye.az

İki aparıcı “Lider”ə qayıtdı

Aparıcılar Könül Muxtarova və Zaur Nəbioğlu yenidən “Lider” telekanalında fəliyyətə başlayıblar.

Dosye.org Axşam.az-a istinadən xəbər verir ki, onlar səhər saatlarında efirə gedəcək “7 gün” verilişinə aparıcılıq edəcəklər. Proqram hər gün saat 09:15-də başlayacaq.

Qeyd edək ki, K.Muxtarova ötən televiziya mövsümü başa çatanda telekanaldan ayrıldığını bildirmişdi. Bir müddət əvvəl o “Xəzər”də aparıcılıq edirdi.

Z.Nəbioğlu isə artıq bir neçə ildir “Lider”dən çıxıb. O, bir müddət ANS və ATV-də çalışmış, daha sonra aparıcılıqdan uzaqlaşmışdı.

Dosye.org

Xəbər Lenti



 

 

Рейтинг@Mail.ru

Ünvan: Azərbaycan Nəşriyyatı Dosye.org redaksiyası. Baş direktor Elman Nigaran. tel: (012) 409 20 21: (055) 251 59 95
email: dosye.org@mail.ru
Saytdakı materialların istifadəsi zamanı istinad edilməsi vacibdir. Məlumat internet səhifələrində istifadə edildikdə hiperlink vasitəsi ilə istinad mütləqdir.