Mədəniyyət


Azərbaycanın xalq artisti vəfat edib

Azərbaycanın xalq artisti, xanəndə Qəndab Quliyeva vəfat edib.

Oxu.Az-ın məlumatına görə, bu barədə xanəndənin oğlu Hafiz Həmidov APA-ya bildirib.

Qəndab Quliyeva xəstəxanadan evə aparılarkən yolda dünyasını dəyişib.

Ürək çatışmazlığından əziyyət çəkən xanəndə bu gün müalicə olunduğu Respublika Müalicəvi Diaqnostika Mərkəzində süni tənəffüs aparatından ayrılıb.

Mərhumla vida mərasimi sabah keçiriləcək. Xalq artisti Binə kənd qəbiristanlığında anasının yanında dəfn olunacaq.

Qeyd edək ki, xalq artisti Qəndab Quliyeva iyunun 16-da Respublika Müalicəvi Diaqnostika Mərkəzinin reanimasiyasına yerləşdirilib.

Ona ürək çatışmazlığı və xroniki böyrək çatışmazlığı diaqnozu qoyulmuşdu.

Qəndab Həbib qızı Quliyeva 1949-cu il avqust ayının 10-u Füzuli rayonunun Dilağarda kəndində anadan olub. 1976-1980-ci illərdə Asəf Zeynallı adına Bakı Musiqi Məktəbində, daha sonra Azərbaycan Dövlət İncəsənət Universitetində təhsil alıb.

İlk muğam müəllimi Nəriman Əliyev olub. 1981-ci ildən Azərbaycan Dövlət Opera və Balet Teatrında solist kimi fəaliyyət göstərib.

Teatrın səhnəsində Leyli (“Leyli-Məcnun”),  Əsli (“Əsli və Kərəm”), Ərəbzəngi (“Şah İsmayıl”), Şahsənəm ("Aşıq Qərib”), Gülbahar (“Gəlin qayası”), Xanəndə qız (“Vaqif”) rollarını yaradıb.

Dosye.az

Lənkəran teatrı İrana qastrol səfərinə gedəcək

Lənkəran Dövlət Dram Teatrının truppası İran İslam Respublikasına qastrol səfərinə gedəcək.

Oxu.Az Report-a istinadən xəbər verir ki, teatrın direktoru Tofiq Heydərov kollektivin İran İslam Respublikasının Dram Sənəti Mərkəzi tərəfindən bu ölkəyə dəvət olunduğunu bildirib.

İyunun 29-dan iyulun 1-ə kimi nəzərdə tutulan səfər zamanı Lənkəran sənətçiləri qonşu ölkənin Parsabad şəhərində Bəhram Beyzayinin “İlan Sultan” tamaşası ilə çıxış edəcəklər.

Dosye.az

Nazir Xalq artistinə vəzifə verdi

Gəncə Dövlət Filarmoniyasına yeni rəhbər təyin edilib.

Oxu.Az-ın APA-ya istinadən verdiyi məlumata görə, mədəniyyət və turizm naziri Əbülfəs Qarayev Gəncədə keçirilən regional müşavirədə Azərbaycan Dövlət Akademik Opera və Balet Teatrının solisti, Xalq artisti Samir Cəfərovun Gəncə Dövlət Filarmoniyasına rəhbər təyin olunduğunu açıqlayıb. S.Cəfərov şəhər mədəniyyət ictimaiyyətinə təqdim edilib.

Dosye.az

 

Xalq artisti reanimasiyaya yerləşdirildi - Vəziyyəti ağırdır

Xalq artisti Qəndab Quliyeva xəstəxanaya yerləşdirilib.

AzVision.az xəbər verir ki, bu barədə Lent.az-a sənətçinin oğlu Hafiz Həmidov məlumat verib. O bildirib ki, Qəndab Quliyeva bu ilin fevral ayından sonra ürəyindəki problemlər səbəbindən infarkt keçirib. Daha sonra tanınmış xanəndə 3 dəfə insult keçirib. O, hazırda Respublika Diaqnostika Mərkəzinin Reanimasiya şöbəsindədir. Həkimlər müğənninin vəziyyətinin ağır olduğunu bildiriblər.

Xalq artistinin oğlu anasının müalicəsi üçün müvafiq qurumlardan və imkanlı şəxslərdən yardım istəyib.

Qeyd edək ki, Qəndab Quliyeva 1949-cu ildə Füzuli rayonunda anadan olub. 1992-c ildə Xalq artisti fəxri adına layiq görülüb.

Dosye.az

Möhsün Sənaninin anadan olmasından 117 il ötür

Azərbaycan SSR Xalq artisti, “Qırmızı Əmək Bayrağı” ordeni laureatı, aktyor Cəfərov Möhsün Sadıq oğlu (Möhsün Sənani) 19 iyun 1900-cu ildə Gürcüstanın paytaxtı Tiflisdə dünyaya gəlib.

Oxu.Az xəbər verir ki, Möhsün Sənani 4-5 yaşında ikən valideynləri vəfat edib, nənəsinin himayəsində yaşayıb. 1906-cı ildə nənəsi onu mədrəsəyə qoyub. Onun məqsədi nəvəsini mollalığa hazırlamaq və gələcəkdə onu atası kimi mərsiyəxan etmək idi. 1908-ci ildə nənəsi vəfat edir, xalası molla Zinyət onu öz himayəsinə götürür. Molla Zinyət Azərbaycanın Xalq artisti Əli Qurbanovun anasıdır. O, Sənaninin oxuması ilə şəxsən məşğul olur. Ancaq Zinyət xanımın da vəziyyəti yaxşı deyildi, onun ailə üzvləri çox idi. Kiçik yaşlı Möhsün 1909-cu ildən işləməli olur. O, Şeytanbazarda hər cür əzab-əziyyətə və böyük zəhmətə qatlaşır.

Səhnə həvəsi Sənanidə yeniyetmə yaşlarından yaranıb. O, yerli teatrların və Tiflisə qastrola gələn artistlərin tamaşalarına böyük həvəslə baxır, həm teatr aktyorlarının oyununa, həm də meydanlarda oxuyan dərvişlərin səsinə fikir verir və onları təqlid edir. Bu minvalla özünün oxumaq qabiliyyətini inkişaf etdirir.

1911-ci ildə Möhsün birinci dəfə geniş izdiham qarşısına çıxır. Böyük həyəcan keçirsə də, onun çıxışı dinləyicilərə, tamaşaçılara dərin təsir bağışlayır. Möhsün 1912-ci ildə kiçik həvəskarlar dərnəyinə qoşulur və bu dərnəkdə birpərdəli səhnələrdə oynamağa başlayır. Möhsünün ilk rejissoru Tiflis müsəlman artistləri dəstəsinin müqqədir komik aktyoru Mirzəxan Quliyev olub.

1915-ci ildə M.Sənani, Mirzəli Abbasov, Mirseyfəddin Kirmanşahlı, Mirzəxan Quliyev, Mustafa Mərdanov və başqaları Tiflis truppasına cəlb edilirlər. M.Sənani 1915-ci ildən 1920-ci ilə kimi orada çalışır. 1921-ci ildən Bakının teatr səhnələrində parlamağa başlayır. O, nəinki teatrda, eləcə də, kino sənətində də yaddaqalan, təkrarolunmaz rollar ifa edib. Bunlardan “Səbuhi”, “Bəxtiyar”, “O olmasın, bu olsun”, “Sehrli xalat” və başqa filmlərin adını çəkmək olar.

Qeyd edək ki, M.Sənani Azərbaycan SSR Xalq artisti, aktyor Əli Qurbanovun xalası oğlu, Azərbaycan Respublikasının Xalq artisti, televiziya aparıcısı, aktrisa Ofeliya Sənaninin qayınatası olub.

O, 11 fevral 1981-ci ildə dünyasını dəyişib. 

Dosye.az

Xəbər Lenti



 

 

Рейтинг@Mail.ru

Ünvan: Azərbaycan Nəşriyyatı Dosye.org redaksiyası. Baş direktor Elman Nigaran. tel: (012) 409 81 02: (055) 251 59 95
email: dosye.org@mail.ru
Saytdakı materialların istifadəsi zamanı istinad edilməsi vacibdir. Məlumat internet səhifələrində istifadə edildikdə hiperlink vasitəsi ilə istinad mütləqdir.