Müsahibə


Gəncədə qardaşı qızı ilə qaçan kişidən şok açıqlama - "Deyirdi dostlarınla yatacağam"

"On bir aya uşaq olur?"

Gəncə şəhər sakini, üç uşağını və həyat yoldaşını atıb qardaşı qızıyla qaçdığı deyilən Həsən Səfərov danışıb. İstiPress-in "olkə.az"a istinadla verdiyi məlumata görə, o, həyat yoldaşının səsləndirdiyi ittihamlarla razılaşmayıb. "Onun danışdıqları doğru deyil". İstiPress 38 yaşlı şəxsin müsahibəsini təqdim edir:

- Qadın bildirir ki, yazışmalarınızda qardaşınız qızıyla bir-birinizə öpüşlər, ürək fotoları göndərmisiniz...

- Martın 11-də Güneli qardaşıyla Bakıya yola salmışam. Ailəsində bir az söz-söhbət var idi. Qardaşı dedi ki, aparım, sakitçilik olsun, gətirərəm.

- Günel sizin qardaşınız qızıdır...

- Bəli.

- Günel indi haradadır?

- Qardaşıyla bir yerdə qalır Bakıda. Orada işləyirlər.

- Bəs siz haradasınız?

- Şəmkirdə.

- Bacınız da dolayısıyla sizin Günellə münasibətinizi təsdiqləmiş oldu.

- Xeyr, bacım da mənim dediyimi deyir. Səhər danışmışıq. Həm də mənim telefonumu oğurlayıb aparıb. Hansı telefonla yazışmışam ki? O niyə özündən danışmır? Ötən ilin mart ayının 31-də evdən qaçdı. Gedib polisə yalandan şikayət elədi ki, Həsən gəlib Poçt qəsəbəsi adlanan yerdə məni döyüb. Amma Allaha and olsun, döyməmişdim, evdəydim. Polislər də gəlib gördülər ki, evdəyəm. Onun şikayətinə görə altı yüz manat cərimələndim. Təzədən yaltaqlandı ki, ağıllanmışam.

- Evdən niyə qaçsın ki? Səbəb nə idi?

- Uşaqları götürüb bacanağımgilə getmişdi. Rəhmətlik anam soruşdu ki, Həmidə, hara getmişdin? Dedi, yaxşı edirəm, gedirəm gəzirəm. Qardaşımın qırx mərasimi günündə o anamı saçından tutub yerlə sürüdü, sonra da özü polis çağırdı. Çox şeylər var e...

- Bildirmisiniz ki, üçüncü uşaq sizin deyil.

- Bəli, üçüncü uşaq mənim deyil. DNT testi verməyə də razıyam, sözümə də başımla cavabdehəm. Çox üzr istəyirəm, o mənə dedi ki, fevralın 20-dən uşağa qalmışam. Uşaq isə yanvarın 5-də anadan olub. On bir aya uşaq olur? Apardım kirayədə saxladım, özüylə Aynurə adlı bir gəlin gətirmişdi.

- Qohumu idi?

- Xeyr, qohumu deyildi. Bir dəfə də Beyləqandan evlərindən qaçıb Gəncədə sığınacağa gəlmişdi.

- Əgər onun başqasıyla münasibətinin olduğunu hiss edirdinizsə, niyə ondan sonra bir il bir evdə yaşadınız?

- Bir ayda üç kirayə dəyişdim. Gündə bir taksiylə gəzirdi. Mən özüm motosikletlə zibilxanalardan dəmir yığıb satan olmuşam. Çörəkpulum zibildən çıxırdı. Gündə bir "zerkalni" nömrədən yığırdı ki, uşağa filan şey oldu, gəl. Gədəbəydəyəm, zəng edib ki, gəl, uşağın başı partlayıb. Əlli manat verib taksiylə tələsik gəlmişəm, uşağın başındakı sarığı açıram ki, heç nə olmayıb. Bir dəfə də çıxıb getmişdi, gedib dostumgildən çıxartmışam. Mənə deyirdi ki, sənin acığına dostlarınla yatacağam.

- Və son olaraq, Günel ailəlidirmi?

- Bəli.

Dosye.az

Nigar Camal: "Kişi mənə toxunanda..."

Londonda yaşayır, buna görə Bakıda az-az olur.

Dediyinə görə, Azərbaycana dəvət aldığı tədbirlərə qatılmaq, bir də doğmalarına baş çəkmək üçün gəlir. Bu dəfə də kino təqdimatlarının birinə qatılmaq üçün Bakıya təşrif buyurub. Biz də fürsəti fövtə vermədik, cazibədar müğənnini söhbətə çəkdik.

- Nigar son vaxtlar Bakıda az-az görünürsən, niyə?

- Bakıya doğmalarımın yanına gəlib-gedirəm, amma vaxtımın çoxu İngiltərədə keçir. Bunun da səbəbkarı qızlarımdır. Çünki ana kimi onların yanında daha çox olmalıyam. Bu saat məni qızlarımın təhsili və gələcəkləri çox düşündürür.

- Müsahibələrinin birində demişdin ki, qızların ingilis dilində danışır, nə əcəb doğma dilini öyrənməyiblər?

- Bu, aldıqları təhsilə görədir. Amma Azərbaycan dilində çətinliklə də olsa danışırlar.

- Gənc, yaraşıqlı xanımsan. Yenidən ailə qurmaq barədə düşünürsən?

- Açığı, ikinci dəfə ailə qurmaq, hələ ki, planımda yoxdur. Mənim üçün önəmli olan qızlarımdır. Yəni ana olmaq səadəti mənə daha çox zövq verir.

- Sevgidə əks cinsin hansı xüsusiyyəti sənin üçün daha önəmlidir?

- İlk növbədə, kişi sevdiyi qadına hörmət və diqqət göstərməlidir. Bu iki xüsusiyyət mütləq olmalıdır. Hörmət olmayan yerdə heç sevginin də dəyəri olmaz.

- Qarderob sənin üçün çoxmu önəmlidir?

- Dəhşət dərəcədə. Geyim həyatımın bir hissəsidir.

- Nigar Camalın qarderobu başqalarından daha çox nəylə fərqlənir?

- Qarderobumda boş yer yoxdur; yəqin ki, bununla.

- Əşyalarına qarşı sadiqsən?

- Yox. Kim nə istəyirsə, bağışlayıram.

- Bir ara sosial şəbəkədə maraqlı rəqslərinlə diqqət çəkdin. Bu işlə peşəkar səviyyədə məşğul olursan?

- Öyrənmək üçün bir-iki müəllim yanına getdim. Amma daha çox özüm rəqs etməyi sevirəm.

- Sosial şəbəkədə də aktivsən. Daha çox nə yazırlar sənə?

- Xoş sözlər. Sevgilərini ifadə edirlər, mahnılarımı bəyəndiklərini yazırlar.

- Heç xətrinə dəyən söz olur?

- Olur.

- Cavab yazırsan?

- Yox, həmin adamları boş verirəm. Nə isə xoşum gəlməyəndə, silirəm və dərhal da "blok" edirəm (gülür).

- Çox pozitivsən. Sənin əsəbiləşməyini təsəvvür etmək çətindir...

- Yox, arada əsəbiləşirəm, amma uzaqbaşı beş dəqiqə çəkir. Sonra yenə həminki adam oluram. Gülürəm-danışıram.

- Ətrafındakı insanlarda ən çox hansı xüsusiyyəti dəyərləndirirsən?

- Səmimiyyəti. Belə insanları xoşlayıram və daha çox onlarla ünsiyyət qururam. Görəndə ki, səmimi deyil, həmin adamla söhbətə qoşulmuram. O da bunu hiss edir.

- Gözəlliyin üçün nə qədər pul xərcləyirsən?

- Həddən artıq çox...

- Məsələn?

- Lap cox...

- Pulu sevirsən?

- Mən pulu sevməkdən çox, xərcləməyi sevirəm.

- Daha çox nəyə pul xərcləyirsən?

- Şoppinqlərə.

- Nigar, filmə dəvət etsələr, ehtiras, sevişmə səhnəsinə çəkilərdin?

- Çəkilərdim, amma sevişmə səhnəsinə razılıq verməzdim.

- Niyə?

- Çünki xarakterim elədir ki, xoşum gəlməyən kişi mənə toxunanda əsəbiləşərəm. Yalnız sevdiyim insan toxunarsa, xoşum gələr. Filmdə hansısa aktyorla bu mümkün deyil.

- Kişilərdə nifrət etdiyin xüsusiyyət hansıdır?

- Bu saat onlar mənə maraqlı deyil.

- Dünya ulduzları kimi sən də bədəninin hansısa əzasını sığorta etdirərdin?

- Yox, hesab edirəm ki, bu, mənasız işdir. Bir dəfə 2011-ci ildə məşhur sığorta şirkətlərindən biri üzümü sığorta etmişdi. Çünki mən onların siması seçilmişdim.

- Neçəyə?

- Milyon yarıma.

Afaq Bəşirqızı: 14 ermənini evimdə gizlətmişdim

Xalq artisti Afaq Bəşirqızı Sumqayıt hadisələrindən danışıb.

Oxu.Az femida.az-a istinadən Sumqayıt hadisələrinin canlı şahidi olan aktrisanın müsahibəsini təqdim edir:

- Afaq xanım, o gün Sumayıtda nə baş vermişdi?

- Sumqayıt Şəhər Partiya Komitəsinin birinci müavini mənə zəng etdi ki, şəhərdə ara qarışıb, insanlar aqressivdir, onları sakitləşdirmək üçün bizə köməyiniz lazımdır. Meydana Sumqayıtın bütün tanınan insanları, ziyalıları dəvət olunmuşdu. İnsanları sakitləşdirmək üçün ora getdim. Ora gedəndə ara qarışmışdı, dəhşətli mənzərə idi. Meydanda çoxlu insan vardı. Heç vaxt mitinqdə iştirak etməmişdim deyə sonradan analiz edəndə bunun ermənilər tərəfindən əvvəlcədən hazırlanmış qarşıdurma olduğunu bildim.

- Hadisələrin ermənilər tərəfindən təşkil olunduğunu necə anladınız?

- Meydanda insanların qara paltoda və şotland şərfində olması diqqətimi çəkdi. Sumqayıt fəhlə şəhəri idi. O palto və şərfdə gəzən insalara çox nadir hallarda rast gəlmək olardı. Amma Sumqayıt hadisələri zamanı beş nəfərdən biri bu geyimdə idi. Əsas da hadisənin təşkilatçılarından biri, məhz o geyimdə tutulmuşdu. Onlarda ermənilərin böyük siyahısı var idi. Ermənilərin hamısına toxunmurdular. ”Krunk” adlı təşkilata kömək etməyən erməniləri öldürürdülər. Təşkilata pul köçürən ermənilərin evinə isə girmirdilər. İlk vaxtlar bunu başa düşmək mümkün deyildi.

- Sizi də öldürmək istəyirdilər.

- O zaman Sumqayıt hadisələrinin səbəbkarı kimi göstərilmişdim. Akademik Aqanbekyan bu hadisəni dərinləşdirmək üçün mənim kimi məşhur insanın həbsini və güllələnməsini çox istəyirdi. Ona görə Aqanbekyan durmadan erməni təşkilatlarına teleqram vururdu. Hətta onlar klubun nəzdindəki afişalarımı götürüb aparmışdılar. Onlar mənə ölüm cəzası verməyə görə çox çalışdılar.

- Məhkəmə prosesiniz neçə ay çəkdi?

- Məhkəmə xüsusi nəzarət altında keçirilirdi. 9 ay 14 gün çəkdi. Cinayət işinin ilk 6 ayını Moskvanın xüsusi idarəsi aparırdı, sonra isə Ümumrusiya Xüsusi Kəşfiyyat İdarəsi apardı.

- Necə oldu bu hadisədən sağ çıxıdınız?

- Məni həbs etmək və yaxud da güllələmək üçün əllərində heç bir sübut yox idi. Bunun üçün kimləri isə erməniləri öldürməyə səslədiyimi əks etdirən videogörüntülər olmalı idi. Əksinə, hadisələr zamanı öz evimdə erməniləri saxlamışdım.

- Belə bir gərgin zamanda evinizdə erməni saxlamışdınız?

- Sumqayıtdakı birotaqlı mənzilimdə 14 nəfər ermənini və onlara gələn qonaqları gizlətmişdim. Edik, Şura, qızı, onun həyat yoldaşı və digər qonşumuz olan ər-arvad, oğlu, gəlini və nəvələr idi. İki gün evimdə qalandan sonra saat 01:30-da onları özüm şəxsən BTR-ə mindirib, Füzulinin Tuğ kəndinə yola saldım.

- O ermənilərlə sonradan görüşə bildiniz?

- Yox, heç bir xəbərim olmadı. Tuğ kəndində idilər. Sadəcə, Ediklə sonuncu dəfə söhbət edəndə dedi ki, “Krunk”a üzv olmayanların siyahısı bayaq adını çəkdiyim həmin qara paltolu şəxslərin əlində olub.

- Onların yerini öyrənmək üçün sizə təzyiq göstərirdilər?

- Pul təklif etmişdilər ki, ermənilərin yerini deyim.

- Sizə pul təklif edənləri tanıyırdınız?

- Onları tanımaq qeyri-mümkün idi, amma onlar məni çox çətin tanıdılar. Erməni saxladığıma görə kimsə məni satmışdı. Erməniləri evimizdə gizlətdiyimiz bir vaxtda qapımız döyüldü. Qara paltolu, şotland şərfli iki nəfər və onlarla bərabər 2-3 uşaq da qapıda dayanmışdı. Qapı açılanda onlar məni tanımadı, amma yanlarındakı uşaqlar tanıdı və “Afaq xanımın evidir, evinizdə erməni var?” deyəndə hər iki şəxs təəccüblə biri-birinə baxdı. Məni tanıyırmış kimi salam verdilər. Elə bilirdim ki, onlar azərbaycanlıdırlar. Bizim dildə səlis danışırdılar. Təbii ki, onların azərbaycanlı olmadığını sonradan dərk etdim.

- Bəs vəziyyətdən necə çıxdınız?

- Çox həyəcanlı idim. Ermənilərin bir hissəsini hamamda, yarısını da mətbəxdə gizlətmişdim. Qara paltolu şəxslərdən biri mənə dedi ki, eşitmişik evinizdə erməniləri saxlayırsınız. Əsəbiləşdim, dedim ki, utanmırsınız, əlinizdə pul tutmusunuz, bu nə deməkdir? Dedilər ki, ermənilərin yerini deyən adamlar mükafatlandırılır. Onlara bildirdim ki, siz səhv gəlmisiniz, mənim birotaqlı evim var. Necə erməni gizlədə bilərəm?

- Ümumiyyətlə, bu hadisələr zamanı erməni meyitləri gördünüzmü?

- Xeyr, görmədim. Gizlətdiyim erməniləri evdə qoyub, yenidən meydana gedəndə gördüm ki, meydan yenidən qarışıb. İnsanlar qışqırırdı ki, “dənizin sahilinə bir avtobus azərbaycanlı meyit gətirilib, ermənilər başlarını kəsiblər. Hətta qan avtobusun qapısından axıb yerə tökülür” kimi sözlərlə azərbaycanlıları ermənilərə qarşı qızışdırırdılar. Mən o zaman dedim ki, əgər burada mitinqdirsə, meyitləri dəniz qırağından götürüb meydana gətirək onlar da bu vəhşiliyin şahidi olsun. Bu sözü demişdim ki, meydanda bayaqkı qışqırıq səsləri kəsildi. Hadisələri qızışdıranlar başqası idi, qızışanlar isə bizmkilər.

dosye.az

“Oğlan evi”nin Babası: “Məşhur olsam da, heç bir qadın eşq elan etmir”

Elcan Rəsulov: “Bizim kişilərin “arvadımı gözəl oynamışınız” deyəcəyini gözləmirdim”

“Oğlan evi” filmində canlandırdığı Baba obrazı ilə tamaşaçıların sevimlisinə çevrilən aktyor Elcan Rəsulov Musavat.com saytının suallarına cavab verib. Aktyor-parodiyaçı ilə rol aldığı ekran işlərindən, şəxsi həyatından və gələcək planlarından danışdıq:

- Başlayaq lap əvvəldən.”Oğlan evi” filminə dəvət necə gəldi?

-  “Lider” televiziyasının yaradılış günü üçün verilişlərin parodiyasını hazırlayırdıq.  Orada iranlı həkim obrazını canlandırmışdım. Videolarımı İlham Qasımov “Youtube” kanalında görmüşdü. Mənə dedi ki, film çəksək, bu ləhcədə davamlı danışa bilərsən? Dedim ki, əlbəttə. Ssenari yazıldı, çəkildim.

- Bilirəm ki, çox seçici insansınız, hər filmə, hər seriala çəkilmirsiniz. “Oğlan evi”nə dəvət alanda heç tərəddüd etdinizmi?

- Seriallara çəkilmirəm.  Nə zaman  seriallara normal aktyor heyəti yığıb, normal qonorar verəcəklərsə, onda çəkiləcəyəm. Bir ATV-də yayımlanan “Ər-arvad ”da çəkilirəm. Çünki peşəkar işdir, peşəkara uyğun da pul verirlər.  İşləmək lazımdır. Zamanımızı da çox almırlar. Nə vaxtsa məsələni Azərbaycansayağı edib, deyəcəklər ki, qardaş, həftənə bu qədər verirəm, o zaman oradan da uzaqlaşacağam.  Özlərinə də demişəm. “Oğlan evi” barədə də çox götür-qoy etdim. İlham bəydən 3 film üçün müqavilə bağlamaq təklifi gəldi. Razı olmadım. 3 filmə birdən imza atmağa qorxdum. Belə razılığa gəldik ki, hər filmdən əvvəl müqavilə imzalayaq. Çünki ola bilərdi ki, film yaxşı alınmazdı. Mən bilmədiyim işə niyə imza atmalıyam?  Məncə, düzgün addım atmışam.

- “Oğlan evi” son 3-4 ildə çəkilən filmlərin arasında ən çox bəyəniləndi. Sizcə,  “Oğlan evi” filminin uğuru nədədir?

- Zarafatları seçərkən gərək gündəlik və köhnəlmiş zarafatlardan istifadə etməyəsən. Bir də situasiyalı komediya oynayasan. Mütləq filmdə potetika olmalıdır. Çəkdiyin filmin sonunu nəyəsə bağlamalısan. İndi o şeylər yoxdur. “Oğlan evi-2” birincidən ona görə zəif hesab edildi ki, potetikadan uzaqlaşmışdılar. Mən də demişdim ki, uzaqlaşsanız, birinci qədər effektli olmayacaq. Düzdür, ikinci filmi daha güclü hesab edənlər də var. Birlə iki bir-birini tamamladı, ikinin zəif olduğunu düşünmürəm.

- Bəlkə də, birinci film çox uğurlu alındı. İnsanlar ikincini daha güclü gözləyirdi. Birinci səviyyəsində olduğu üçün onlara zəif gəlib...

- Məncə, haqlısınız. İkincini bəyənən tamaşaçı da çoxdur. Bir də reklamlar məsələsi var.  Sponsor olmasa, film yaratmaq çətindir. Lakin  ikincidə də maksimum çalışılmışdı ki, reklamlardan az istifadə olunsun.

- Reklam çox olsa da, tamaşaçını bezdirmirdi. Səviyyəli şəkildə təqdim edilmişdi...

- Hollivud, Bollivud, Avropada da bu cür reklamlardan istifadə olunur. Amma yenə başlayıb kolbasanı reklama görə kamera qarşısında doğramağa, dükanın adını göstərib içinə girməyə. Filmə baxırsan ki, ssenariyə aidliyi yoxdur, amma  aktyor məhsul reklam edir. Bu cür reklamlar sponsoru da, filmi də hörmətdən salır.

- Keçən dəfə müsahibə zamanı İlkin Həsəni də reklam məsələsinə toxundu. Bildirdi ki, sponsoru səviyyəli reklama razı sala bilmirlər...

- Hazırda rol aldığım “Ər-arvad” serialından narazıyam. Söhbət serialın səviyyəsindən getmir, sponsordan gedir. Biz əvvəldən danışmışdıq ki, sponsorun məhsulunu maraqlı və yaddaqalan edək. Sponsor  özü kinonu və serialı reytinqdən salır, sonra deyir ki, bu serialın reytinqi yoxdur. Onlar başa düşmürlər ki, onlar gələndə bu serial reytinqli idi, onların insanı bezdirən reklamı reytinqi aşağı salıb. Deyirlər ki, mənim markamı elə də, belə də göstər. O zaman reytinq düşür. Ona görə də Aqil M. Quliyev sponsorla danışacaq ki, elə edək həm reklam hörmətli olsun, həm də serial. Mən pulsuz  işləməyə razıyam, nəinki o reklamlarla. Tez-tez deyirlər ki, bizdə rejissor da, aktyor da yoxdur. Onları qınamıram. O qədər  film çəkməyə, aktyorluq etməyə çalışdılar ki, sənəti gözdən saldılar. Artıq evdə oturan da deyir ki, mən bunu edə bilərəm. Biz elə iş görməliyik ki, evdə oturan heyran qalsın və deməsin ki, bunu mən də, oğlum da edə bilər.  Bu gün sənətdən başı çıxmayanlar film çəkməyə çalışır. Bəzən deyirlər ki, xaricdə filankəsi yoldan tutub gətiriblər, məşhur aktyor olub. Onun istedadını görüb gətiriblər. Bizdə isə “bu sponsorun qardaşıdır, filankəsin bacısı oğludur” deyib, kinoya çəkirlər. Nəticədə göz qabağındadır.

- Mahmud baba” filminin qala gecəsində aktyor Fəqan Məmmədov bildirdi ki, filmin çəkilişləri zamanı bir çox şirkət onlara sponsorluq etmək istəyib. Lakin sosiska, kolbasa yeməmək üçün razı olmayıblar. Lakin biz saydıq, filmdə gözə batan  9 reklam vardı və insanın gözünü yorurdu. Bizim hələ saya bildiyimiz bu idi...

- Kolbasa, sosiska da hamının dilinə düşüb. Kolbasa yoxdur, orda da maşın təkəri, dükan qapısı var. “Oğlan evi-2” də “Kapital bank”ın reklamı var idi. Axırda belə etmişdilər ki, telefon açıq qalır, söhbət  bankın yaddaş kartına yazılır. Sonra “Nar mobile”ın reklamı vardı. İsi obrazının boynundan Nar asılmışdı. Məsələni zarafata bağlamışdılar. Çünki ehtiyac vardı. Hollivud filmlərində də reklam var, razılaşılır ki, aktyor “Coca-cola” yazısının yanından keçəcək. Orada demirlər ki, aktyor kolanı açacaq, içəcək, üstəgəl tərifləyəcək. Ən yaxşı reklam sadəcə gözəçarpan reklamlardır. Amma gözəbatan reklamlar özümüzü gözdən salır.

- Bir də “İnstagram” izləyicisinə inanıb film çəkənlər var. Onlardan biri də son təqdim olunan “Üç badam, bir qoz”dur. Rol alan məşhur vinerlərdir. Onlar sosial şəbəkədə yazmışdılar ki, sosial şəbəkə izləyicilərinə güvənirlər...

- Ən böyük səhv odur. 300-400 min izləyiciyə güvənib iş görmək olmaz. Onlara güvənib alver belə etmək olmaz. Düşünürlər ki, 400 min izləyicim var. Hərəsini 1 manatdan hesablasaq, 400 min manat edir.  Sosial şəbəkəyə güvənib film çəkənlər çoxdur. Oksana Rəsulova da bu cür addım atdı, uğursuz oldu. “İnstagram”  izləyiciləri 1 dəqiqəlik videonun 50 saniyəsinə baxan adamlardır. Çoxu yeniyetmələrdir. Onların bilet alıb baxmaq fikri yoxdur. Bəzən mənə yazırlar ki, Londonda yaşayırıq, sizi sevirik, film internetdə qoyulsaydı, baxardıq. Gəlib kinoteatrda izləmə şansımız yoxdur.

Bizim bir bədbəxtliyimiz də ondadır ki, aktyorlar ləhcələrdə danışa bilmirlər. “Hoqqa”da maşın sürən oğlan guya, Aran ləhcəsində danışır. Amma bacarmır. Bəzən deyirlər ki, insanları ləhcə ilə güldürürsünüz, bu çox asandır. Amma elə deyil. Mən iki dəfə Şəkidə olmuşam, şəkilidən yaxşı danışıram Şəki ləhcəsində. Bu şeylər çox çətindir. Üç söz öyrənməklə ləhcə ilə danışmaq olmur. Özünü hörmətdən salırsan, filmə baxanı da qıcıqlandırırsan. Bilmirsən, get soruş.  Əgər mən filmdə telefon ustasını canlandıracağamsa, ustanın yanına gedib, 2 günə bəzi şeyləri öyrənərəm. Ona görə ki, telefon ustası filmə baxıb desin ki, halal olsun bu kişiyə, necə dəqiq bilir. “Ər-arvad”ın ilk 4 seriyasında nə etməli olduğumu bilmirdim. Obrazın formasını 4 seriyadan sonra tapdım.

- “Ər-arvad” başlayanda deyirdilər ki, xarici layihənin eynisi olacaq. Amma ssenari bizə xas oldu. Əsl Azərbaycan ailəsi göstərilir...

- Serialın ssenarisi türklərdən gəlir, lisenziyası da onlarındır. İkisini də eyni qadın yazır. İndiyə kimi 7 min ssenari göndərib. Mən də ssenarini götürüb özümünküləşdirirəm. baxıram ki, yazılan ssenari bizim millət üçün gülməli deyil, məcbur olub axırını dəyişirəm. Mənə gələn son 3-4 tədbirdə istəyiblər ki, maraqlı nə isə danışım. Söhbət toydan getmir, tədbirdən gedir, toylara getmirəm. Bəzən danışdığım heç gülməli olmur, amma gülürlər. Düşünürlər i, mən danışıramsa, gülməlidir, onlar anlamayıb.

- “Ər-arvad” serialında tipik Azərbaycan kişilərini göstərirsiniz. Sizə kişilərin reaksiyası necə olur?

- Kişilər tərəfindən tənqid olumamışam. Mənə videolardan göndərirlər ki, burada yoldaşımla məni canlandırmısınız, filan səhnədə mənim yoldaşımı göstərmisiniz. Heç vaxt düşünməzdim ki, bizim kişilər bu cür sözlər yazar. Bəzən təkrar mövzuları çəkirik, amma yenə də baxılır.

-Təkrar səhnələr olduğunu dediniz, eyni zamanda seriyalar arasında fasilələr var.

- Çəkilişlərin fasilələrlə olması mənimlə əlaqədardır. Ölkədə olmuram deyə çəkiliş edə bilmirlər. Biz işə peşəkar komanda ilə başladıq. Sonra komanda da bəzi dəyişikliklər oldu, indi işimizdə axsama var. Hər şeyi yenidən əvvəlki vəziyyətə gətirməyə çalışırıq. Serialın keyfiyyətini qaytaracağıq. Qaytarmasaq, gərək serialı bağlayaq. Çox adam bu  fikirlə razılaşmır. Amma işin keyfiyyəti ölübsə, bağlamaq lazımdır. Əgər əvvəlki vəziyyətə gəlməsə, serialdan ayrılacağam. Mənə deyirlər ki, serialdan ayrılsan, efirdə olmayacaqsan. Adam var ki, 5 ildir ard-arda seriala çəkilir, amma mənim qədər tanınmır. Gərək yaxşı işlər ortaya qoyaq. Nə vaxtsa, mənə verilən obrazı oynaya bilməsəm, aktyorluqdan uzaqlaşacağam. Ciddi deyirəm, arxama baxmadan bu sahədən gedəcəyəm və başqa işlə məşğul olacağam. Bacarıqlı oğlanam, meyxana deyərəm, başqa iş görərəm.

- Artıq kinoteatr tamaşaçısı yaranıb.  Sizcə, teatr tamaşaçısı da yenidən yaranacaqmı?

-  Çoxları qorxurdu ki, kinoya pul qoyar, pulu batar. Ürəkli oğlanlara  halal olsun ki, kino sahəsinə sərmayə ayırdı və bu sahə dirçəldi. Çox istəyirəm ki, bu şeylər teatr sahəsində də özünü göstərsin. Çox istəyirəm teatrda oynamaq, tamaşa hazırlamaq. Mən təkliflər verdim ki, 10-12 nəfərlik teatr üçün məkan ayırın, şərait yaradın. Mənə müsbət cavab verən olmadı. Alınsaydı, sübut edəcəkdim ki, teatr tamaşaçısı var, onlar tamaşalara gəlmək istəyir.

- Teatrlarımızın repertuarı illərdir ki, eyni qalıb.  Dəyişiklik olmadığı üçün tamaşaçı da teatra üz tutmur. Düşünür ki, bu gün baxdığım tamaşaya gələn il niyə baxım?

- Haqlısınız. Nə inkişaf edirlər, nə də dəyişikliyə imza atırlar. Rus Dram Teatrının həmişə tamaşaçısı var, çünki əziyyət çəkirlər. Dövrlə səsləşən tamaşalar səhnəyə qoyulmalıdır. 

-Fuad Poladovun Dövlət Dram Teatrındakı son tamaşasına axın vardı. Deməli, lazım olsa, tamaşaçı teatra gələr...

- Fuad Poladovu 4-5 il idi ki, teatrda saxlamışdılar. Eyni tamaşanı oynayırdı. Ondan lazımi səviyyədə istifadə etmədilər. Onun üçün yeniliklər etmək lazım idi. Fəxrəddin Manafovdan, Fuad Poladovdan istifadə etmək lazımdır. O adamları boş-boş yorurlar. O yaşda aktyorları həvəsləndirmək lazımdır, yaxşı obrazlar və qonorar verilməlidir. O zaman gözəl iş olur. Teatrda yenilik etmək, hər yaş təbəqəsini qarışdırmaq lazımdır. İstədiyim səviyyəyə çatmasa, məni teatra çağırsalar da, getmərəm. Mənə desələr ki, 4000 manat maaş verəcəyik və həftədə 1 tamaşa oynayacaqsan, razılaşaram. O maaşı hazırda heç kim mənə verməz. Məcburam özüm nə isə yaradam. Şəhərdə o qədər boş qalan restoranlar var ki, illərdir ki, orada şənlik olmur. Onlardan birini bizə versinlər, teatr açaq, tamaşa hazırlayıb, tamaşaçı cəlb edək.

 - “Heç vaxt oynamaram” dediyiniz obraz varmı?

- Elə obraz çoxdur, mən seçim edən adamam. 60 reklam təklifi gəlib, razılaşmamışam. Düşünmüşəm ki, yaxşı iş olmayacaq. Onlar elə bilib ki, pula görə deyirəm, qonorarı artırıblar. Amma onları başa salmışam ki, mənim üçün pul hər şey deyil. Mən həm də tamaşaçıyam, özümün baxıb bəyənməyəcəyim işdə yer almaram. Bəzən anam zəng edib deyir ki, o verilişə getmə, getmirəm. Bilir ki, aparıcı reytinq üçün nə isə deyər. Mən də mübahisə salaram. Canlı efir  zay olar, aparıcını işdən qovarlar, məni də kanalda qara siyahıya salarlar. Getmirəm, başım da sakitdir.

- Mövqeyi olan aktyorlardansınız. Sosial şəbəkələrdə də ölkədə baş verənlərə münasibət bildirirsiniz, tənqidi fikirlər səsləndirirsiniz...

- Düşünürəm ki, bəlkə həmin adam oxuyub başa düşər. İstəyirəm ki, mənə də fikir bildirsinlər, onlar da tənqid yazsın. Biri işini həddən artıq reklam edir, ona aid bir şey yazıram. Mən qala gecələrinə gəlmirəm. Olar ki, nümayiş zamanı problem olsun, ya filmi bəyənməyim. Amma onların yanında məcbur qalıb tərifləyim.  Yalandan tərifləməmək üçün qatılmıram. Tək gedib baxıram. Mənə deyirlər ki, heç kimi pisləmə, sonra səndən xoşları gəlməz. Mən bilirəm ki, üzümə gülsələr də, məndən xoşları gəlmir.

- Müsahibələrinizin birində də demişdiniz ki, şou aləmdə dostunuz yoxdur.

- Yoxdur. Heç biri ilə dostluq etmirəm. Bilirəm ki, məndən xoşları gəlmir. Üzümə gülüb “can qardaş” desələr də, xoşları gəlmir.

- Niyə  xoşları gəlmir?

- Bunu onlardan soruşmaq lazımdır. Kənardan çox yekəxana görünürəm. Bir az da tərif demək qabiliyyətim yoxdur. Əla iş görəndə də yaxşı olduğunu deyirəm. Bu sahə belədir ki, hər gecə bir yerə qaçırlar. “Bu gün filan kəsimizin ad günüdür” deyib tort alıb onun qapısına gedirlər. Sonra da şəkil çəkib paylaşırlar. Mən getdiyim yerləri çəkib paylaşsam,  dəli olarlar. Günlərlə təyyarədə oluram. Elə olub ki, səhər yeməyini bir ölkədə, günortanı başqa, axşamı tam başqa ölkədə yemişəm. Bunları paylaşmıram.

- Dediniz ki, tez-tez xaricə üz tutursunuz. Nə iş görürsünüz orada?

-  İngilis və rus dilini mükəmməl səviyyədə bilirəm. Gedib aparıcılıq edirəm. Onlardan aldığım pul mənə sərf edir. Yol, geyim və qalmaq pulum ödənir. Mənə də normal pul qalır. Azərbaycan yumorlarını rus və ingilis dilində danışıram, onlar da gülürlər. Qazancım da məni qane edir. Mən artıq yolunu tapmışam.  Buranın şou proqramının maaşı ilə dolana bilmərəm. Azərbaycanda isə restoranda çıxış edəndə 100 manat verirlər. Bir ayağım  xaricdədir. Normal qazandığım üçün burada seçim edə bilirəm. Qazana bilməsəm, burada nəyəsə çəkilməyə məcbur olacağam. O məcburiyyətdə məni quyunun dibinə salacaq.

- Pul qazanandan seçici olmusunuz, yoxsa öncədən hədəfləriniz və öz yolunuz olub?

- Mən əvvəllər də belə idim. Tələbə vaxtı heç bir çəkilişə getmirdim. Gedib telekanalda veriliş hazırladım ki, tanınım və özləri məni dəvət etsin. Istədiyimə çatdım. Hər zaman hədəfim olub. Əziyyət çəkən oğlan olmuşam. Heç vaxt köməyim olmayıb. Vəziyyətim pis olsa da, qohum-əqrəba kömək etməyib. Atam rəhmətə gedəndə çabalayırdım, evin böyük uşağı idim, evi dolandırmalıydım. Mənim yerimdə kim olsaydı, özünü öldürmək həddinə gələrdi. Yaxınlarım çabaladığımı bilirdi, heç biri kömək etmədi. Mən də onlardan ummadım. İndi onları saya da , saymaya da bilərəm.  O vaxt mənə kömək edib, minnət qoysaydılar, indi kimisə düşünərdim.

- Bir az da şəxsi həyatınızdan danışaq. Niyə ailə qurmursunuz?

- Yaxın 2-3 ildə evlənməyi düşünmürəm.  İntensiv işləməyi düşünürəm. Hələ tezdir. Özümü gec  təsdiq etmişəm. 20 yaşımda təsdiq etsəydim,  27-28 yaşımda evlənərdim. Mən özümü 28 yaşımda təsdiq etmişəm.  İndi də 30 yaşım olur. Ona görə işi uzadıram. Tez təsdiq etsəydim, indi minimum bir uşağım vardı.

- Analar adətən övladlarını evləndirmək üçün tələsirlər. Sizdə necədir vəziyyət?

- Mənim anam mənimlə dostdur. Deyir ki, evlilik çətin prosesdir. Işini gör, ayaqüstə dura bilən kişi ol. Əmin ol ki, 1 daha sonra bir neçə nəfəri saxlaya bilərsən, o zaman evlən.

- Sosial şəbəkədə aktivsiniz. Sizə eşq elan edən xanımlar da yoxdur?

- Mənə eşq elan etmirlər. Tamaşaçılarım da özüm kimidir. Yazırlar ki, hörmət edirik, izləyirik. İzləyicilərim real insanlardır. Əgər yazsam ki, 10 minə ehtiyacım var, azı 7000 yığılacaq. Və ya biri zəng edəcək ki, izləyicilərindən yığma, gəl verim. 

- “Facebook”da izləyicilərinizə verdiyiniz sualı mən də sizə vermək istəyirəm. İnsanın səviyyəsi hansı meyarla ölçülür?

- Bizdə insanın pulu, görünüşü ilə ölçürlər. Sualı da ona görə yazmışdım. İnsanların fikri mənə maraqlıdır.  Bizim şou bazarda da geyimlə, maddi imkanla ölçürlər. Deyirlər, filan kəsin pulu var, filan yerdə yaşayır, səviyyəli adamdır. Biri metro ilə gəlsə, ona yuxarıdan aşağı baxırlar. Əslində isə o adam çox intellektual adam olur. Düşünürəm ki, bu dövrdə müvəqqətidir. İnsanların düşüncəsi dəyişəcək. Səviyyəli insanlara, keyfiyyətli xarakterə qiymət veriləcək.

“Nizami” kino mərkəzində yerləşən "Nizami Restaurant and Lounge"a təşəkkürlər. (Könül İbrahim  Məhəmməd Türkmən (fotolar Musavat.com)

dosye.az

Mətanət: “ANS mənə qazdığı quyuya özü düşdü” — MÜSAHİBƏ

Ölkə.Az saytının qonağı məşhur televiziya və radio aparıcısı Mətanət Əliverdiyevadır.

- Televizoru açırıq Mətanəti görürük, radionu açırıq Mətanəti eşidirik, seriala baxırıq yenə Mətanət..

- Deyir ki, min yeyənin olsun, bir deyənin olmasın. Necə də üzümə dedin e. (gülür) Bu dəyirmanın suyu Sumqayıtdan gəlir. Mən orada doğulmuşam. Sumqayıtın havası mənə pozitiv enerji verir. İşimdən stimul alıram. İşimi sevirəm, ona görə də beləyəm. Mən şən olmağı sevirəm. Problemlərimi hər zaman kənarda saxlayıram. Heç vaxt problemləri simamda görə bilmərsiniz. Kənardan baxanda bəlkə də deyirlər ki, dünyanın ən xoşbəxt adamıdır. Amma bu dünyada tam olaraq xoşbəxt olmaq mümkünsüzdür. Düzünü desəm, heç istəmərəm də tam xoşbəxt olum. Onda hər şey maraqsız olar. Belə daha yaxşıdır.

- Hər işə özünüzü sınamaqla bir növ özünüzü problemlərdən kənarda tutmaq istəyirsiniz?

- O problemi həll edən də mənəm, kənarda qoyan da mənəm, içini qurdalayan da! Hər biri mənə aiddir. Mən vunderkind yox, universal insanam. Hətta univermaq Mətanət də deyə bilərsiz (gülür). Çalışıram ki, müxtəlif sahələrdə özümü sınayım. Həyatsevərlik məni buna sövq edir. Həyatı sevən, ona bağlı olan insan istəyir ki, onu da etsin, bunu da etsin. Hər şeyə baş aparır.

- Bu qədər işin arasında ailəyə necə vaxt ayırırsınız? Yemək biş-düş etmək, ev işləri görmək və s. alınırmı?

- Onları da edirəm. İndi əllərimə baxsanız, onların qabarlarından, cızıqlarından çox şey etdiyimi görərsiniz. Elə vaxt olur ki, heç əl kremi də vurmuram. Vaxtım olmur. Evə nə vaxt getsəm, evin işini də görürəm, yemək də bişirirəm. İki oğlum var, onların paltarlarını da yuyuram, ütüləyirəm. Düzdür, yola salmıram, amma bunları edirəm. Səhər isə saat 6-nın yarısı alaqaranlıqda evdən çıxıram. Buna rəğmən hər şey edirəm.

- Radionu yəqin ki, televiziyadan üstün tutursunuz. Nə də olsa, oradan gəlmisiniz və orada fəaliyyət göstərirsiniz.

- Radionu çox sevirəm. Üstün tutmaq azdır, sevirəm. Desələr ki, televiziyaya çıxma, elə radioda qal, inanın qalaram. Yolda gedəndə 3-5 nəfər mənə “səni sevirik”  deyirsə, mənim üçün dünya deməkdir. Demək, nəsə edə bilmişəm.

- Amma radioda səsinizlə tanındınız, televiziyada isə simanızı görüb tanıdıq.

- Düzdür, televiziyada daha geniş kütləyə xitab etmişəm, amma radio əvəzolunmazdır. Çox vaxt radio aparcılarını tanımırlar. Amma mən fəxr edirəm ki, haradasa nəsə danışanda o dəqiqə deyirlər ki, siz o xəbər aparıcısınız. Yəni, söhbət bundan gedir. Səslə də nələrisə demişəm.

- İslanmışın yağışdan qorxusu yoxdur. “İslanmışlardansınızmı?”

- Doğulanda elə suyun içində doğuluruq. Gör, Allah bizi necə gözəl yaradır. Allah qorxusundan, Allahdan başqa kim var ki?! Artıq o vaxtdan Allah qorxusu ilə insan islanır. Allahın yaratdığı bəndədən heç vaxt qorxmaram. Mən mübariz insanam. Ulu tanrıdan başqa heç nədən qorxmuram.

- Efirdə tez-tez tənqidi fikirlərlə çıxış edirdiniz. Buna görə yəqin ki, sizdən inciyənlər çox olub.

- Mən hətta öz övladımı belə tənqid edirəm. O demək deyil ki, övladımı sevmirəm. Hətta övladlarıma, ətrafımdakılara deyirəm ki, nəsə səhv edəndə mənə deyin. İrad tutub, siz də tənqid edin. Bilmədiyim şeyi heç vaxt tənqid etmərəm. Hansı sahədə nəyisə bilirəmsə, demək orada mənim də nəyisə qurdalamağa ixtiyarım var.

- Sosial şəbəkələrdə həddindən artıq çox tənqid olunduğunuz zamanlar oldu. Bir neçə situasiya oldu ki, onlardan sonra tənqidlər qabarıq hal aldı.

- Olan oldu. Kim nə etdi? Heç bir sosial şəbəkədə yoxam. Telefonumun da çox funksiyanı heç bilmirəm. Ancaq “salam, sağ ol” üçün istifadə edirəm. Buna nə həvəsim var, nə də vaxtım. Həmin şəxslər də haqqımda danışdı, danışdı, amma gördülər ki, fayda vermir susdular.

- Səsinizi illər öncə ANS-dən eşitdik, üzünüzü də ATV-də gördük. 17 illik doğma iş yerinizdən ayrılıb, əzəli rəqibin kollektivinə qatılanda nələr hiss etdiniz? Qəribçilik çəkmədiniz?

- Nə? Qəribçilik?! Mən ATV-yə gələndə məni elə qarşıladılar ki, mən özümü necə yad hiss edim? Mən elə bir insanam ki, harasa gedirəmsə, lap meşəyə getsəm, ora da mənə doğmadır. Mən ANS-dən öz xoşluğumla ayrıldım? Məni oradan gül-çiçəklə yola salmamışdılar ki. Bəzi qalmaqallarla ayrılmalı oldum. Yaxşı ki, ANS-dən ayrıldım. Bir məsəl var, özgəsinə quyu qazan, özü düşər. Özləri də elə həmin quyuya düşdülər.

- ANS bağlandıqdan sonra hansı hisləri keçirdiniz?

- Mütəkkəmi qoyub qabağıma oturub hönkür-hönkür ağladım. (kinayəli şəkildə cavab verir) Heç bir hiss keçirmədim. Mən tüpürdümsə, arxama heç vaxt baxmıram. Döndümsə, vəssalam. Yalnız və yalnız irəli gedirəm. Arxada qalan elə arxada qalır. Mən silirəm elə şeyləri. Hər kəs bilir mənim balıqlar bürcü olduğumu. Quyruğumu tapdaladılarsa, gedir mənim üçün.

- Bu qədər işdə işləyirsiniz. Səhərin qaranlığında evdən çıxırsınız. Aldığınız məvacib sizi qane edir?

- Sənə nə, bax, sənə nə?! (gülür) 20 ildən çoxdur artıq bu rejimdə çalışıram. 20 il əvvəl aldığım məvacib bapbalaca idi, amm mən yenə də həvəslə gəlirdim. İndi də nə alıramsa həvəslə gəlirəm. Məni qane edir.

- “Qız atası” serialındakı Mətanətlə bu Mətanətin arasında nə fərq var? Qızlarınız olsaydı, yenə o cür davranardınız?

- Heç bir fərq yoxdur. Orada da təbii halımı canlandırıram. Qızım olsa, basıb gözünü çıxardaram. Mən o rolda sanki anamı canlandırıram. Anam da elə biriydi. Bir şeyi etməyən kimi “damaşnik” gəlirdi başıma, əl atıb saçlarımı yolurdu. (gülür)

- İşığınızı söndürmək istəyənlər çox olub?

- Elə indi də var. Həmin insanlar hər zaman var və olacaqlar. Mən onlarla mübarizə üçün “Azərenerji” ilə müqavilə bağlamışam!

- Bu qədər gözəl xanımsınız. Efirlərdən, radiolardan düşmürsünüz. Yəqin ki, sizə sevgi etiraflarının ardı-arası kəsilməz.

- Əslində, mən sizə nə deyim e... Olmayıb. Vallah, heç kim buna risk etmir. Bunun bilmirəm bir səbəbi varmı, ya yox. Bilirsiniz, ətrafımdakılar mənimlə başqa cür danışır. “Sən qardaşsan, kişi qızsan” deyirlər. Mən nə qardaşam, nə də kişiyəm. Mən xanımam, mən bacıyam, mən bir anayam. Yəni, məni o gözdə kimsə görəndə qıcıqlanıram.

- Bəlkə də evdə çox tapılmadığınız üçün, ailəyə yetəri qədər zaman ayırmadığınız üçün, yoldaşınıza lazımı qayğı göstərmədiyiniz üçün 2 dəfə ayrılmısınız.

- Ailəyə vaxt ayırmaq lazımdır. Həyat yoldaşına da həmçinin. Ona görə də mənlik olmur. Alınmı, alındıra bilmirəm. Toplaya bilmirəm. Dediklərin olsaydı, hə o zaman nəsə ola bilərdi. Amma məndə alınmır.

Söhbətləşdi: Niyam Şirinov

Fotolar: Nurlan Gülməmmədov

Xəbər Lenti



 

 

Рейтинг@Mail.ru

Ünvan: Azərbaycan Nəşriyyatı Dosye.org redaksiyası. tel: (012) 409 81 02: (055) 251 59 95
email: dosye.org@mail.ru
Saytdakı materialların istifadəsi zamanı istinad edilməsi vacibdir. Məlumat internet səhifələrində istifadə edildikdə hiperlink vasitəsi ilə istinad mütləqdir.