Gənclər və İdman Nazirliyinin maliyyə dəstəyi ilə Аzərbaycan Demokratik Tələbə Gənclər Təşkilatının həyata keçirdiyi “Şəki-Zaqatala regionu gənclərinin məşğulluq və karyera imkanlarının artırılması” adlı maarifləndirici layihənin icrasına uyğun təlim-məlumatlandırma sessiyalarının sonuncusunu Qax rayonunda təşkil etdi.
Yerli icra hakimiyyətləri, gənclər və idman idarələri, rayon, şəhər əhalinin əmək və sosial müdafiə və məşğulluq mərkəzləri ilə birgə əməkdaşlıq şəklində həyata keçirilən layihə Şəki şəhərində, Qax, Zaqatala və Balakən rayonlarında məşğulluq imkanları və karyera inkişafına dair sorğu və ictimai monitorinqlərin keçirilməsinə, hər bir rayonda təlim sessiyaları vasitəsilə bu regionun gənclərinə məşğulluq, yeni iş imkanları, karyera inkişafı, CV və istək məktubunun hazırlanması, iş müsahibələri, işaxtaranlar üçün qanunvericilik-normativ sənədlər, işədüzəlmə üçün hüquqi sənədlərin tərtibi, dövlət qulluğuna hazırlıq, yeni peşə-ixtisas və vərdişlərinə yiyələnmə və s. mövzularında interaktiv üsullarla maarifləndirmənin aparılmasına, region gənclərinin Məşğulluq Forumu və sərgisinin təşkilinə, “Uğurlu Karyeraya dair Yaddaş Kitabçası”nın nəşrinə, yayımına, regionun gənc könüllü təlimçilər şəbəkəsinin qurulmasına və geniş PR fəaliyyətinə yönəlib.
Qaxda fəal gənclərin iştirakı ilə keçirilən təlim-məlumatlandırma sessiyasının açılışında ADTGT sədri Asif Əsgərli, təşkilatın sədr müavini, layihənin koordinatoru Gülnarə Bağırova, təlimçi-ekspert Dadaş Əhmədov, rayon gənclər və idman idarəsinin rəisi Əlövsət Bayramov, Qax məşğulluq mərkəzinin direktoru Abdulqədir Əliyev və yerli icra hakimiyyətinin məsul əməkdaşları da iştirak edirdilər.
Rəsmi açılışdan sonra təlimçi-ekspert D.Əhmədov məşğulluq və karyera inkişafı istiqamətində bölgə gənclərinə yeni iş imkanları, CV və istək (maraq) məktubunun hazırlanması, iş müsahibələri, işədüzəlmə üçün hüququ-normativ sənədlər və onların tərtibi, dövlət qulluğuna hazırlıq, bacarıq və vərdişlərinə yiyələnmə və s. mövzularda geniş və zəngin bilgi və informasiyalar çatdırdı.
Təlim iştirakçılarının mövzuları daha maraqlı qavramaları üçün interaktiv məşğələ, rol oyunları, işçi tapşırıqlar və digər maraqlı metodologiyalar tətbiq olundu, sorğu və qiymətləndirmə aparıldı. 2 gün davam edən təlimin sonunda iştirakçılara yekunlara dair sertifikatlar təqdim olundu.
Qeyd edək ki, layihənin əsas mədsədi Şəki-Zaqatala regionunda gənclərə bərabər məşğulluq imkanlarının yaradılması, onların uğurlu karyera inkişafı üçün xüsusi bilik, bacarıq və vərdişlərin aşılanması, bölgə gənclərinin öz gücünə inanmaqda kömək göstərilməsinə və regionda gənclərin fəaliyyət dairələrinin zənginləşməsi üçün müvafiq şəraitin yaradılmasına dəstək verməkdir.
ADTGT İctimai əlaqələr
və informasiya departamenti
COMMENTS