Qara dəniz sahilindəki Soçi şəhərində Rusiya prezidenti Vladimir Putinin vasitəçiliylə görüşən Azərbaycan və Ermənistanın dövlət başçıları İlham Əliyevlə Serj Sərkisyan yeni bir Qarabağ müharibəsi başlatmayacaqlarına söz verdilər.
Dosye.org Modern.az saytına istinadən xəbər verir ki, bunu Türkiyənin “Hürriyət” qəzeti yazıb.
Soçi şəhərindəki “Boçarov Ruçey” iqamətgahında prezidentlər İlham Əliyevlə Serj Sərkisyanı bir araya gətirən Rusiya prezidenti Vladimir Putin “Azərbaycan Respublikasının prezidenti İlham Əliyevin mövcud problemlərin yalnız sülh yolu ilə həll oluna biləcəyini dilə gətirməsini məmnuniyyətlə qarşılayıram. Ermənistan Respublikasının prezidenti Serj Sərkisyanın da həmfikir olması çox əhəmiyyətlidir” deyib.
Putin bildirib ki, iki ölkə liderindən eşitdiyi bu ifadələr keçmiş Sovetlər İttifaqı zamanından miras qalmış Dağlıq Qarabağ münaqişəsinin masa arxasında çözülməsinə imkan yaradır.
Qarabağ münaqişəsinin həllində çıxış yolu tapıla bilməsi üçün buna sağlam fikir və səbrli hərəkətıə davam etməyin vacibliyini önə çəkən Putin daha sonra əlavə edib: “Qarabağ böhranın çox uzandığının mən də fərqindəyəm. Problemin həlli üçün beynəlxalq miqyasad Avropa Təhlükəsizlik və Əməkdaşlıq Təşkilatının (ATƏT) Minsk qrupu da səylər göstərir. Təbii, biz Rusiya olaraq həm coğrafi baxımdan yaxınlıq, həm də Azərbaycan və Ermənistanla tarixi əlaqələrimizə söykənərək, yeni təşəbbüslər də irəli sürməyə çalışacağıq”.
“Hürriyət” qəzeti yazıb ki, prezidentlərin budəfəki görüşündə gərginlik də yaşanıb. Belə ki, Əliyevlə Sərkisyan “yeni bir savaş əvəzinə sülh yoluyla həəlin tərəfdarıyıq” demələrinə baxmayaraq, aralarında yenə də söz atışması olub.
İlham Əliyev son günlər cəbhədə artan gərginlik və Qarabağ probleminin 20 ildən bəri həll oluna bilməməsindən narahatlığını dilə gətirib və deyib ki, “BMT Təhlükəsizlik Şurası illər öncə işğal altındakı Azərbaycan torpaqlarının erməni silahlı qüvvələri tərəfindən boşaldılmasına dair qətnamələr qəbul edib. Ermənistan BMT Təhlükəsizlik Şurasının bu qətnamələrini hələ də niyə yerinə yetirmir?”.
Azərbaycan prezidentinə cavab verən Serj Sərkisyan isə “BMT Təhlükəsizlik Şurasının Qarabağ mövzusunda bir deyil, tam dörd qərarı var. Görəsən Azərbaycan bu qərarlardan hansını yerinə yetirdiyini bizə söyləyə bilərmi?” deyə təəccüb doğuran açıqlama ilə çıxış edib.
Sərkisyanın Azərbaycanın BMT Təhlükəsizlik Şurasının hansı qərarını yerinə yetirməli olduğunu nəzərdə tutması qaranlıq qalıb.
“Hürriyət”in məlumatına görə, üçtərəfli görüşdə Azərbaycan və Ermənistan liderlərinin bir-birini günahlandıran bu açıqlamaları qısamüddətli toplantıda gərginliyin daha da artmasına səbəb olub.
Ancaq Sərkisyan son sözlərində bir qədər yumşaq tərzdə “mən Ermənistan Respublikasının prezidenti olaraq xalqım adına yenə də İlham Aliyevə təşəkkür etmək istəyirəm. Münaqişənin həlli üçün gücdən istifadəyə üstünlük vermək istəmədiklərini söyləməsi hamımız üçün ümidvericidir” deyib.
Soçi görüşünün yekununda Azərbaycan və Ermənistan prezidentləri İlham Əliyevlə Serj Sərkisyan Dağlıq Qarabağ məsələsi üzrə dialoqu davam etdirmək istəyini ifadə ediblər.
COMMENTS