“Turşudan zəhərlənmə bir neçə faktordan ola bilər. Birinci növbədə əgər mənşəyi bəlli olmayan yerdən alınıbsa, xüsusilə də istehsal prosesi hansısa sənaye müəssisəsində olmayıbsa, burada bir çox sanitar-gigiyena qaydalarına əməl olunmadan hazırlanıbsa, seçilən meyvə-tərəvəz, istifadə olunan qida məhsulları təmiz yuyulmayıbsa və bir çox hallarda da düzgün emal prosesi keçməyibsə turşudan zəhərlənmə halları baş verə bilər. Xüsusilə də turşudan zəhərlənmə həm mikrobioloji səbəblərdən, həm də bioloji səbəblərdən ola bilər. Oksigensiz mühitdə daha sürətlə inkişaf edən bakteriyalar var ki, bunlar daha çox ciddi zəhərlənməyə səbəb olmaqla yanaşı, hətta ölümlə də nəticələnə bilər. Bunun əlamətləri görmə qabiliyyətinin itməsi, başağrıları, udqunmada və nəfəsalmada çətinlik, baş gicəllənmə və əzələ zəifliyi kimi özünü göstərir. Ən kəskin zəhərlənmə budur”
Bunu Moderator.az-a açıqlamasında Qida Təhlükəsizliyi Hərəkatının rəhbəri, Sağlam qidalanma mütəxəssisi Məhsəti Hüseynova deyib. O daha sonra bildirib ki, ev üsulu hazırlanan turşularda risk daha böyükdür:
“İkinci bir nüans da evdə steril olunmadan istifadə olunan qablardır. Tərəvəzlər yaxşı yuyulmadan bankaya qoyularsa, tərkibindəki mikrooqranizmlərin qapalı mühitdə daha da çoxalmasına gətirib çıxara bilər. Eyni zamanda təbii, mövsümündə yetişən meyvələrdən istifadə etmək lazımdır. Əzik, xarab olmuş məhsuldan istifadə etmək olmaz ki, həmin məhsulun keyfiyyəti aşağı düşə bilər. Bütün bunlarla yanaşı konservləşdirilmiş məhsul təmiz və qaranlıq şəraitdə saxlanılmalıdır. Günəş şüaları görünməyən yerdə olmalıdır. Əgər bankaların qapağında şişmə, qıcqırma, köpüklənmə, sızma və yaxud çökmə varsa, bu onun tərkibinin dəyişdiyini və təhlükəli məhsul olduğunu göstərir. Mütləq konservləşdirilmiş məhsullarda yeni qapaqlardan istifadə olunmalıdır. Bəzən təkrar işlənmiş qapaqlardan istifadə edirlər ki, bu da onun paslanmış, xarab olması ilə yanaşı, bərk bağlanmadığına görə oksigenlə təmasa keçməsinə səbəb olur. Bəzən istifadə olunan duzun, limon suyunun, sirkənin miqdarını düzgün tənzimləyə bilmirlər. Bu da qidalarda turşuluq səviyyəsinin yüksək olmasına gətirib çıxarır ki, mikroblar asanlıqla çoxala bilər. Konservin, turşunun qapağı açıldığı müddətdə tez yeyib bitirmək lazımdır. Yaxud da soyuducuda qapağı bərk halda sıxılıb saxlanıla bilər. Hər bir halda sənaye üsulunda hazırlanmış məhsullar ev üsulunda hazırlanmış turşulardan daha təhlükəsizdir. Çünki orada əlavə olunan qatqı maddələri, konservantlar turşuların tərkibinin keyfiyyətinin itməməsinə və mikroorqanizlərim çoxalmamasına uyğun qaydada istifadə olunur” deyə Məhsəti Hüseynova deyib.
COMMENTS