Polis, prokurorluq orqanları isə susur….
Suraxanının sabiq, Şirvanın indiki icra başçısı İlqar Abbasovun qardaşı quldurluq edir…
“Az Pal” şirkətinin sahibi iş adamının avtomobilini girov götürüb…
Beynəlxalq təşkilatların ciddi araşdırmalarına görə, dünyada ən az yaşayan peşə sahiblərindən biri də jurnalistlərdir.
Bəli, jurnalistlərin az ömür sürməsinin səbəbi təkcə təhlükəli bölgələrdə olması, risk etməsi deyil…
Həm də hər gün oxuduqları neqativ xəbərlərin onlarda yaratdığı stress, əzab və mənəvi ağrılardır.
Tam səmimiyyətlə deyirəm ki, indicə oxuduğum xəbər məni əməlli-başlı sarsıtdı.
Axı, biz XXI əsrdə, demokratik ölkədə, sivil cəmiyyətdə yaşayırıq, Allah qoymasa….
İcra başçısının qardaşı kimdir ki, Azərbaycan dövlətinin qanunlarını ayağı altına atır, lotuluq edir, iş adamının başına tapança dirəyir, öldürməklə hədələyir, hələ üstəlik qanuni avtomobilini əlindən alıb bir təpik də vurub qovur…
Zərərçəkən iş adamı polisə, prokurorluq orqanlarına, məhkəməyə üz tutur, amma heç bir faydası olmur.
Təsəvvür edirsiniz, əlacı hər yerdən kəsilən iş adamı deyir ki, Prezident Administrasiyasının qarşısında özümə qəsd edəcəm.
Görün insanı hansı həddə çatdırırlar ki, o öz canına qəsd etmək həddinə çatır.
Bəli, Suraxanının keçmiş, Şirvanın indiki icra başçısı İlqar Abbasovun qardaşı neçə ildir ki, iş adamı Vüqar Əhmədovun həyatını məhv edib.
Belə ki, icra başçısının qardaşı İlham Abbasovun Xırdalanda fəaliyyət göstərən və “Az Pal” şirkətinə məxsus olan dəyirmanı var.
Bəli, Abşeron İlqar və İlham Abbasov qardaşlarının oylağı olub.
Və İlqar Abbasovun şərik olduğu COCA-COLA şirkəti də Xırdalanda yerləşir.
Deməli, şirniyyat sexi işlədən iş adamı qanuni yolla İlqar Abbasovun qardaşının dəyirmanından hər ay un alır və pulunu ödəyir.
Müəyyən zamanda iş adamının borcu yarandığı üçün un almaqdan imtina edəndə İlqar Abbasovun qardaşı deyir ki, “hamının hamıya borcu var, narahat olma..”.
Beləcə iş adamı un almaqda davam edir. Və yavaş-yavaş borcu ödəməyə başlayır.
Peşəkar şirniyyatçı olan iş adamı deyir ki, bir gün icra başçısının qardaşı məni Xırdalandakı ofisinə dəvət elədi.
Və orada mənə dedi ki, imkanlı qohumların var, onlardan pulu al borcu bağla. Mən isə ondan 2 ay möhlət istədim.
Onlar silahı başıma dirəyib hansısa hazır sənədə qol çəkdirdilər. Və mən ofisin həyətində saxladığım kreditə götürdüyüm avomobilimə minmək istəyərkən, yenə silahla məni qorxudub avtomobilin texniki pasportunu və kredit sənədlərini, etibarnaməni zorla mənim əlimdən alıb mənə fiziki təzyiq etdilər.
Şikayətçi iş adamı deyir ki, mən iflic oldum və xəstələndim. Ancaq 2 ay tamam olmamış borcu bağlayıb avtomobilimi geri almaq üçün icra başçısının qardaşının yanına getdim. Ki, borcu bağlamışam, avtomobilimi qaytarın.
Söhbət zamanı məlum olub ki, iş adamına məxsus avtomobil çoxdan satılıb.
Hələ üstəlik iş adamına İlham Abbasovun qoçuları deyib ki, sənin gecikməyə görə, faizlə 2000 manat borcun da var.
Beləcə çarəsiz qalan iş adamı əvvəlcə Suraxanı Rayon Polis İdarəsinə müraciət edib. Bir neçə aylıq süründürmədən sonra cavab verilib ki, müraciət hadisənin baş verdiyi ərazinin polisinə, yəni Abşeron RPİ-ə olunmalıdır.
Bir neçə aylıq araşdırmadan sonra Abşeron polisi də işi bağlayıb.
Şikayətçi deyir ki, Abşeron RPİ-nin təhqiqatçısı açıq şəkildə mənə dedi ki, icra başçısından çəkinirik.
Bu dəfə şikayətçi Abşeron rayon prokurorluğuna müraciət edib.
Prokurorluq işi yenidən araşdırılması üçün Abşeron RPİ-yə göstəriş verib.
Ancaq bu dəfə yeni təhqiqatçı bir müddət sonra işə xitam verib, yəni işə baxılmasını rədd edib.
Sözün qısası, uzun müddət ərzində xəstəlik tapan, müflis olan iş adamı üz tutur Baş prokurorluğa və digər dövlət qurumlarına. Ancaq heç bir nəticə olmur.
İş adamı düşünür ki, bəlkə icra başçısı İlqar Abbasovun qəbuluna gedib qardaşının onun başına açdığı müsibəti desin. Uzun gözləntilərdən sonra icra başçısı İlqar Abbasov şikayətçi iş adamına deyib ki, mən qardaşımın işinə qarışmıram, get özün problemini həll elə.
İndi gördünüzmü, bu ölkədə nələr baş verir..?
Yəqin ki, İlqar və İlham Abbasov qardaşları qanun qarşısında cavab verməsələr də bir gün Allah qarşısında cavab verəcəklər.
Yazıda müxtəlif saytların materiallarından istifadə edilmişdir.
Qarşı tərəfin mövqeyini dərc etməyə hazırıq.(Gündəlik Bakı)
DOSYE.ORG
COMMENTS