Ismayıllı icra hakimiyyəti təkzib etdi

Ismayıllı icra hakimiyyəti təkzib etdi

Bir çox saytlar İsmayıllı Rayon İcra Hakimiyyəti başçısının müavini Sevil Əhmədovanın adına qaz yanacaqdoldurma məntəqəsinin olduğunu Araz Abdullayevin sözləri ilə tirajlayır. Rayon icra hakimiyyəti olaraq belə bir halın olduğunu qətiyyətlə təkzib edirik.

Qaz yanacaqdoldurma məntəqəsini Sevil xanımın qardaşı Vaqif İsmayılov 1998-ci ildə rayon icra hakimiyyəti başçısının sərəncamı ilə 0,2 hektar ərazidə açıb. Həmin ildə də lisenziya alınıb. Haqqında söhbət gedən xanım müavin o zaman icra hakimiyyətində, ümumiyyətlə heç yerdə işləmirdi. S.Əhmədova bu vəzifəyə 2013-cü ildə gəlib.

Obyektivlikdən, ədalətdən, düzlükdən yan keçənlərə xatırlatmaq istərdik ki, Vaqif İsmayılov dünyasını dəyişəndən sonra obyekt qanuni olaraq qardaşı Rafiq İsmayılovun adına keçib.

Qaz yanacaqdoldurma məntəqəsinə hər 5 ildən bir lisenziya, sonuncu isə 16 noyabr 2017-ci il tarixdə verilib. Nömrəsi belədir: İN-10019-2017. Bu lisenziya ASAN xidmətdən alınıb. Bundan əlavə obyektə Fövqəladə Hallar Nazirliyinin Təhlükə Potensiallı Obyektlərin Dövlət Reyestr xidməti 4 may 2018-ci il tarixdə 2023-cü ilə qədər müddəti olan təhlükəsizlik sertifikatı verib.

Şikayətçi Araz Abdullayev isə obyektini 3-4 il bundan əvvəl tikib. Ona və heç kimə qaz yanacaqdoldurma məntəqəsindən heç bir təhlükə yoxdur.

KİV, sayt və portal sahiblərindən, təsisçiləri və redaktorlarından xahiş edərdik ki, yazılarında fakta, mövcud həqiqi duruma əsaslansınlar. Nəyinsə xatirinə kiminsə haqqına, hüququna toxunmasınlar, ədalətsizliyə yol verməsinlər, öz milli mənsubiyyətlərini dərindən dərk edib Azərbaycan xanımına şər atmasınlar.

Bir neçə kəlmə də Sevil xanım barədə deməyi gərəkli sayırıq. O, uzun illər Komsomolun rayon komitəsinin katibi və birinci katibi işləyib. 2000-ci ildə rayon icra hakimiyyətinə məsləhətçi vəzifəsinə təyin olunub. 2013-cü ildən RİH başçısının müavinidir. YAP rayon təşkilatının sədridir. O, keçmiş Xalq Təsərrüfatı İnstitutunu və Politologiya İnstitutunu (partiya məktəbi) bitirib. Rayon ictimaiyyəti arasında işgüzarlığı, səmimiliyi, ədalətli olması və peşəkarlığı ilə fərqlənir.

İsmayıllı Rayon İcra Hakimiyyətinin

informasiya təminatı və təhlil sektor

COMMENTS