Jurnalistin Suriyaya gedən vəhhabi qardaşından xəbər var

Bir müddət əvvəl Suriyaya getdiyini güman edərək sələfi qardaşını axtaran “Paralel” qəzetinin jurnalisti Akif Nəsirli Axar.az-a danışıb.

Qardaşının geri qayıtmasından sonra son vəziyyət barədə açıqlama verən A.Nəsirlinin sözlərinə görə, Firuz Nəsirov xəbərsiz Türkiyəyə getmişdi və onun Suriyada döyüşlərə qatılacağından şübhələnmişdi. Jurnalist deyib ki, həmin zaman polisə müraciət edib, barəsində axtarış verib:

“Onu İstanbula uçmağa qoymamışdılar. Gəncədə idi və geri döndü. Firuz geri qayıdandan sonra aramızda söhbət olub. Dedi ki, İstanbula iş dalınca getmək istəyib və Suriyada döyüşmək fikri olmayıb. Qardaşım indi rayondadır. Ümumiyyətlə, demək olar ki, fikrindən daşınıb. Hərçənd deyir ki, əvvəl də o fikirdə olmayıb”.

A.Nəsirli qeyd edib ki, qardaşı müalicə alır:

“Hazırda heç bir işlə məşğul olmur. Mən o vaxt da demişdim, onun səhhətində problemlər var. Odur ki, müalicə olunur”.

Jurnalistin qardaşı 1981-ci il təvəllüdlüdür və Beyləqanın Əlinəzərli kəndində anadan olub. Orta təhsilli bu gənc əvvəllər musiqi ilə məşğul olub, sələfilərə qoşulandan sonra musiqini buraxıb.

 

Qeyd edək ki, Suriyada müharibə və terror başlandığı vaxtdan xeyli sayda azərbaycanlı orada döyüşməyə gedib. Bəzi qaynaqların verdiyi xəbərlərdə bildirilir ki, Azərbaycandan gedənlər arasında hər iki tərəfdən döyüşənlər var. Şiə təriqətinə aid olanlar Bəşər Əsəd tərəfindən vuruşur, vəhhabilər isə ona qarşı cəbhədə yer alıblar.

COMMENTS