manset


Kamaləddin Qafarovun antiMilli Onkologiya Mərkəzindən tükürpədici DOSYE

anax.jpg

“Hansı evə daxil olaramsa, ancaq xəstənin xeyrini düşünəcəyəm, qəsdli olan bütün pisliklərdən qaçacağam, istər azad, istər kölə olsun, kişi və qadınların bədənini sui-istifadə etməkdən çəkinəcəyəm”.

Bu sətirlər Hippokrat adından bir sitatdır. Hippokrat andı həkimlərin Tanrıdan sonra ən ali səcdəgahıdır. Amma Azərbaycan səhiyyəsində xidmət edənlərin neçə faizinin Hippokrat andına sadiq olduğunu təxmin etmək çox çətindir. Hətta mümkün deyil.

Onların nifrət və qəzəb doğuran hərəkətlərinin dəfələrlə şahidi olmuşuq: həkim səhlənkarlığından ölümlər, pulu olmayan xəstə baxılmaması, səhv diaqnoz və müalicələr, dərmanların satışı, yoxsula, təcili əməliyyata ehtiyacı olan kasıblara zərrə qədər mərhəmət göstərməmək – Hippokrat andında olmayan, Azərbaycan səhiyyəsində isə olan hallardır.

Bunun üçün çox uzağa getmək də lazım deyil: Milli Onkologiya Mərkəzinin qapısından həkim otağına, müayinəxanadan əməliyyat stoluna qədər pul, pul və yenə pul tələb olunur. Pulun yoxdursa, bədənindəki o zəhrimar şişin torpağa gedənə qədər yayılmasına məhkumsan. Neçə-neçə yalvarışlar, göz yaşları, imdad çığırtılarına baxmırlar, ölümlə əlləşən xəstələri soğan qabığı kimi soyurlar – antiMilli Onkologiya Mərkəzinin işçiləri…

Onlara fərq etmir ki, xəstənin həyatı ağırdır, yaşayışı necədir, əsas həmin gün gəliri olsun, axşam ailəsinə gedəndə fərasətli, pulqazanan adam kimi ad çıxarsın. Və ən dəhşətlisi budur ki, hansısa uşaq poliklinikasında, mərkəzi xəstəxanada yaxud adi tibb ocağında rüşvət baş alıb getsə, yenə də Azərbaycan reallıqlarına uyğun anlayarsan.

Amma söhbət xərçəng xəstəliyindən əziyyət çəkən, yaşamağa ümidi az olan adamların yaxınlarından pul qoparılmasından gedir. Onların pulu da gedir, xəstənin sağalmasına nicat da yoxdur.

AntiMilli Onkologiya Mərkəzinin işçiləri isə qurulan sistemə biət edərək, rüşvəti xərçəng kimi bütün mərtəbələrə yayıblar. Bu işin başında kim durur sualına gəlincə, təqdim etdiyimiz linkdə onların (http://mom.gov.az/?smode=idare-heyeti) kimliyi aydınlaşır.

Xüsusən də baş direktorun müavini, parlamentin üzvü olan deputat Kamaləddin Qafarov MOM-da tükürpədici şərait yaradıb. Bir gün canından bezmiş, səfalət içində yaşayan xəstələrdən biri özünü Milli Onkologiya Mərkəzinin qarşısında yandırsa, heç bir təəccüb doğurmaz. Çünki mətbuat ardıcıl yazıb, hüquqşünas Alsan İsmayılov dəfələrlə problemi ictimailəşdirib, jurnalistlər MOM-dan rüşvət videolarını yayıblar, di gəl çi fayda?!

Anaxeber.Azmediaya istinadla yazır ki, insanlar onkoloji xəstəlik şübhəsi yarananda ilk müraciət etdikdə müayinə üçün cürbəcür adlarla 500 manata yaxın pul verməli olurlar. Onkoloji xəstəlik müəyyən edildikdə kimyaterpiya keçmək üçün müayinə sənədlərini müalicə edəcək həkimə çatdırılması insanların özlərinə qadağandır.

Həmin müayinə kağızlarını bir korpusdan başqasına aparmaq üçün əməkdaşlara 20 manat verilməlidir. Kimyaterapiya 300 manatdır.

Bundan əvvəl də bəzi müayinləri keçmək üçün 60 manatdan 100 manata qədər də rüşvət verilməlidir.

Nəzərə almaq lazımdır ki, xərçəng xəstəliyinə tutlumuşlar hər 21 gündən bir kimyaterapiya qəbul etməlidirlər və hər dəfə də eyni pulları verməlidirlər. Bəzi xəstələrin şüa da qəbul etməsi qaçılmazdır. Onun da 28 seansı 1000 manatdır. Bu faktları təqdim edəcəyimiz videolardan da görmək olar.

Həmçinin, sosial şəbəkələrdə yazırlar. Məsələn, Səbuhi Hüseynov yazır: “6 il əvvəl şahidi olmuşam. Elə murdarlar var ki…bütün xərclər həkimə yox, kassaya ödənilirdi”.

Ruslan Əfəndi yazır: “Leukeran qan xərçnəgində xlorombusil pereparatlardandir. Pulsuz verilməlidir, 25 manata satılır”.

Rada Əliyeva: “MRT üçün 110 manat yerinə 55 manat verdim, nazirliyin işçisi olduğumu dedim, az qala məni güllələsinlər”.

Dəyanət Sabir Ağayev: “Qohumum Fərəcova Leyla Baba qızı Mərkəzi Onkoloji Mərkəzdə pullu müayinə edildi və 600 manat çıxdı.

Pulu çatmadığına görə əvvələ Gəncədə, sonra ev şəraitində müalicə edildi, axırda dünyasını dəyişdi. Bu faciəni bu sistemi quranların da başına gəlməsini arzulayıram”.

Və saysız-hesabsız belə şikayətlər, məlumatlar şərhlərdə yer alıb. Onlar bu səhiyyə ocağındakı dəhşətlərdən söz açıblar. Amma indiyə qədər heç nə dəyişməyib.

Amma ölüm ayağında olanlara MOM rəhbərliyi tərəfindən heç bir mərhəmət göstərilmir. Deputat K.Qafarov seçicilərinə laqeyd olduğu kimi, həkim peşəsində də ağır xəstələrə qarşı biganədir.

Axı bu mərkəzə gələnlər qrip, bağırsaq çöpü olan, ya da böyrək daşı olanlar deyil, onlar ölümlə çarpşırılar, yaşamaq üçüm mübarizə aparırlar, amma belə həssas məsələyə bazarlıq gözü ilə baxırlar. Bunu Allah da bağışlamaz, qanunlar da…

Əvəzində isə bu il Milli Onkologiya Mərkəzi (MOM) “Azəri Med” MMC ilə ümumi məbləği 26,8 mln manat olan müxtəlif mal və xidmətlərin satınalmasına dair altı müqavilə imzalayıb. Deyərsiniz ki, hə, nə olsun?

Məsələnin mahiyyəti odur ki, şirkət bu müalicə mərkəzinin direktor müavini, həmçinin parlamentin deputatı olan Kamaləddin Qafarova məxsusdur. Deçəyə başqa söz qalmır, şərhsiz…

Xatırladaq ki, dövlət satınalmalar reyestrinə əsasən, yanvar və mayda “Azəri Med” MMC MOM-dən ümumi məbləği 9 mln 699,9 manat olan dərman, sarğı materialları və müalicə preparatlarının alışına dair iki müqavilə imzalayıb.

Şirkət avadanlıqların təchizatı üzrə ümumi məbləği 12 mln 996,6 min manat olan iki müqavilə alıb. “Azeri Med” MOM-nin iki qeyri-profil sifarişini yerinə yetirməlidir: xarici ekspertlərin xidmətlərinin ödənişi (121,7 min manat) və yuyucu və dezinfeksiyaedici materialların alınması (144,9 min manat).

Əvvəlki illərdə də şirkət Onkologiya Mərkəzinin çoxmilyonluq sifarişlərini yerinə yetirirdi.

Satınalmalar üzrə dövlət portalında 2017-2018-ci illərdə bununla bağlı tenderlərin elan edilməsinə dair məlumat yoxdur. “Azəri Med” MMC (VÖEN 1500072561) 2004-cü ildə təsis edilib.

Müstəqil qiymətləndirmələrə görə, şirkət Azərbaycana dərman preparatları və tibbi avadanlıq idxal edən şirkətlərin ilk onluğuna daxildir.

Kamaləddin Qafarov “Kanon” MMC, “Mega Pharmacy” MMC, “Azəri Med MNK” MMC, “Versal” MMC, “Versal Palace” MMC, “Naturalist” firmasına nəzarət edir. Daha iki şirkət (“Cardinal Health” və “Ruslan-Az”) ləğv edilmə mərhələsindədir. (Anaxeber.az)

Dosye.org

Ramiz Zeynalov erasının sonu: “QAİ generalı”nın imperiyası süqut edir

impe.jpg

Son illər Azərbaycanda bir sıra dövlət idarələrində struktur islahatlarının aparıldığı bəllidir.

Bütün bunlar onunla əlaqədardır ki, həmin qurumlar effektiv fəaliyyət göstərə bilmir. Təbii ki, bunun obyektiv səbəbləri ilə yanaşı, subyektiv səbəbləri də yox deyil. Lakin görünən odur ki, ölkə başçısı bu cür islahatlarla hər iki problemi eyni vaxtda həll etmək fikrindədir.

Baş Dövlət Yol Polisi İdarəsi ləğv olunacaqsa...

Nəqliyyat Nazirliyindən sonra kütləvi ictimai narazılığın ünvanlandığı əsas qurumlardan biri də Daxili İşlər Nazirliyinin Baş Dövlət Yol Polisi İdarəsi (DYP) olduğu sir deyil. Təsadüfi deyil ki, bu qurumda mövcud olan problemləri həll etmək mümkünsüz olduğundan, Baş Dövlət Yol Polisi İdarəsinin də adının dəyişdirilərək, yenidən formalaşdırılması məsələsi müzakirə olunmaqdadır. Bir neçə həftə əvvəl cumhuriyyet.az saytı da bu haqda maraqlı araşdırma ortaya qoymuşdu. Sayt yazırdı ki, DYP-nin bazasında Dövlət Avtomobil Müfəttişliyinin yaradılması nəzərdə tutulur. İddia olunur ki, son illər sosial şəbəkələrdə və mediada yol polisi haqqında biabırçı video çarxların yayılması, ictimai rəydə qurumun heç bir nüfuzunun qalmaması DYP-nin ləğvini həqiqətən də zərurətə çevirir. Yeni qurumun yaradılması, həm də DYP-ni ailə biznesinə çevirən, 5 ildir təqaüd yaşı çatsa da, hələ də kreslosunu qorumaq üçün dəridən-qabıqdan çıxan Ramiz Zeynalovun daha yeni və çevik bir kadrla əvəz olunmasına səbəb olacaq. Bir sözlə, böhran dönəmində dövlət büdcəsini talayan məmurların büdcəni dolduracaq məmurlarla əvəzlənməsi ən doğru yoldur.

Təsadüfi deyil ki, DYP rəsmiləri ASAN xidmətdə ödənilən çərimə çeklərini belə tanımaqdan imtina edir. Bu cür təfəkkürlə, bu cür yanaşma ilə bu qurumun heç bir gələcəyi ola bilməz. Xüsusən də açıq-aşkar hökümətin islahat adddımlarına qarşı çıxırsa…

Xatırladaq ki, xeyli müddətdir ölkədə narazı qalınan əsas dövlət qurumları içində iki strukturun xüsusi olaraq adı çəkilirdi. Onlardan biri Nəqliyyat Nazirliyinin tərkibində fəaliyyət göstərən Nəqliyyat Müfəttişliyi idisə, digəri də Dövlət Yol Polisi Xidmətiydi. Bildirək ki, bu iki nəhəng dövlət qurumundan artıq biri yoxdur. Və işin qəribə tərəfi odur ki, Nəqliyyat Müfəttişliyi ləğv edilərək, ən çox şikayət olunan digər quruma, Baş Dövlət Yol Polisi İdarəsinə (BDYPİ) verilib.

Dövlət Avtomobil Müfəttişliyi yaradılır…

Məlumata əsasən, Nəqliyyat Nazirliyinin səlahiyyətsizləşdirilməsindən sonra daha bir neçə qurumun da eyni aqibət yaşayacağı proqnozlaşdırılır. Artıq proqnozlara uyğun olaraq bəzi qurumlar ləğv olunub. Məsələn, MTN artıq yoxdur. Eyniylə, Dövlət Satınalmalar Agentliyi də dövlət başçısının fərmanı ilə ləğv edilib.

Sırada isə digər qurumların olacağı istisna deyil. Bununla bağlı cumhuriyyet.az-a verilən məlumatlarda qeyd olunur ki, BDYPİ-nin ləğv edilməsi məsələsi də artıq gündəmə gəlib. Məsələ belədir ki, Nəqliyyat Müfəttişliyinin birləşdirildiyi BDYPİ-nin ləğv edib, yerində Dövlət Avtomobil Müfəttişliyinin yaradılması nəzərdə tutulur.

Əlbəttə, belə bir zərurətin yaranmasının tutarlı əsasları var. Məsələ belədir ki, artıq təkcə mediada deyil, eyni zamanda sosial şəbəkələrdə də DYP-nin fəaliyyəti ən ağır formada tənqid edilir. Və bu tənqidlər əvvəlki dönəmlərdən fərqli olaraq, hansısa şikayətlərin əsasında deyil, elə canlı şəkildə çəkilmiş videogörüntülərin əsasında formalaşıb. Cəmiyyətin tələbi budur ki, ya BDYPİ ləğv olunmalıdır, ya da tamamilə dəyişdirilməlidir. Yəni, ən azından keyfiyyət dəyişikliyi baş verməlidir.

Struktur islahatları generalı bitirəcək

Qeyd edək ki, ləğv ediləcək və bazasında yeni bir qurum yaradılacaq dövlət təşkilatının başına kimin rəhbər gətiriləcəyi də maraqlı müzakirələrdən biridir. Bu posta yetərli qədər layiqli adamın olduğuna şübhə yoxdur. Həmçinin polisdə BDYPİ-dən də daha artıq qurumları idarə edə biləcək şəxslər var və bunu kimsə inkar edə bilməz.

Yeni qurumun yaradılmasından sonra onun başına yenidən BDYPİ-nin rəisi, general Ramiz Zeynalovun gətirilib-gətirilməyəcəyi məlum deyil. Məsələ belədir ki, faktiki olaraq mövcud duruma görə məsuliyyət yükü generalın üzərindədir və ona qarşı əsas ittiham da budur ki, BDYPİ-ni lazımi səviyyədə idarə edə bilmədiyi üçün bu qədər neqativ hallar meydana çıxır. Belə olan təqdirdə, xüsusən də indiki həssas məqamda rəhbərlik də dəyişiklik etməkdə məcburiyyət hiss edəcəklər. Ona görə ki, cəmiyyətdə sosial səbəblərdən narazılıq baş qaldırdığı bir vaxtda, bir də BDYPİ kimi çoxlu şikayətlər edilən qurumda əsaslı dəyişiklik etmək zərurəti var. Yeni kadrın ən azı keçid dönəmində durumu düzəldə biləcəyi istisna edilmir. Hərçənd Ramiz Zeynalovun pensiya yaşından 5 il keçib. Amma bu müddət ərzində onun işdən çıxarılması məsələsi gündəmə belə gəlməyib. Özü də bunca şikayət varkən.

Generalın hüdudsuz biznes şəbəkəsi

Qanunla dövlət orqanlarında çalışan şəxslərin bizneslərinin olması qadağandır. Amma Azərbaycan reallıqlarında qanunun tələbləri işə yaramır. Elə bu səbəbdəndir ki, ölkənin ən iriçinli məmurlarının topdağıtmaz biznesləri var. Elə zənn etməyin ki, Ramiz Zeynalov da digər məmur həmkarlarından fərqlənir. Onun da geniş biznes sahələri, əlaqələri və imkanları var. Və təbii ki, hamısından da yararlanır.

Bildirək ki, Ramiz Zeynalovun ölkənin şimal və cənub rayonlarında çoxsaylı asfalt və beton zavodları, daş karxanaları fəaliyyət göstərir. Məsələn, Qubadakı Vəlvələ çayı yaxınlığında meşə massivinin 5 hektarlıq hissəsi məhv edilərək, yerində 4 ay ərzində daş karxanası və beton zavodu inşa edilib. Həmin zavodun avadanlıqları isə Almaniyadan gətizdirilib.

Ramiz Zeynalovun biznesini kimlər idarə edir?

Bu sualın çeşidli cavabları ola bilər. Çünki biznes yalnız bir nəfərin idarəçiliyində deyil. Bununla bağlı da mediada yer alan məlumatlar üzərində apardığımız araşdırmalardan məlum oldu ki, hər bir biznes sahəsi üzrə ayrı-ayrı şəxslər təhkim olunub və onların öz vəzifələri var. Məsələn, Ramiz Zeynalovun beton zavodları və daş karxanalarının idarəçiliyi DYP-nin alay komandiri, polkovnik Balakişi Əhmədovun nəzarətinə verilib. Hətta bu yaxınlarda Əhmədov Cənub bölgəsində generalın yeni inşa edilmiş zavodunun açılışına belə getmişdi.

Şübhəsiz, BDYPİ rəisinin təkcə beton zavodları, daş karxanaları yoxdur. Onun əsas «biznesi» elə rəhbəri olduğu qurumdadır. Yerli MERO-ların fəaliyyətindən xəbərsiz olmayan yoxdur. Nömrə alverindən tutmuş, sürücülük vəsiqələrinə qədər hər şeyin alınıb-satıldığı idarədə bu işlərə nəzarət heç də uzaq bir şəxsə verilməyib. Bu işlər birbaşa onun bacısı oğlu Xəqanidədir ki, o da Tovuz MERO-nun rəisidir. Bakıdan 400 km aralıda yaşamasına baxmayaraq, hesablaşmalar, alqı-satqıların mühasibatlığını həyata keçirən MERO rəisi kəsdiyi başa görə, sorğu-sual edilmir.

Təbii ki, o da digər həmkarları kimi, nömrələri təsnifləşdirib müxtəlif qiymətlərə satır. Oxudun, oxumadın fərq etməz, sürücülük vəsiqəsi istəyəndən pulunu alıb, ona sənəd verir. Bu barədə ayrıca bir araşdırmamız olacaq. Və orada Ramiz Zeynalovun bacısı oğlunun gördüyü bir sıra pünhan işlərdən bəhs edəcəyik.

İndi isə qayıdaq yenidən Zeynalovun biznesinə. Onun Tovuzda və ölkənin müxtəlif yerlərində villaları, otelləri, istirahət mərkəzlərinin olduğu da sirr deyil. Məsələn, Tovuzdakı «Ayan Palase» də Zeynalovlardan kənar şəxslərə məxsus deyil. Orada bir gecənin neçə yüz manat olduğunu da bilməyən yoxdur.

Ardı var. Bizi izləməyi unutmayın...

Dosye.org

Xəzər Aslanovdan ŞOK AÇIQLAMA: " Sizə görə nə üçün mənim adım Ramiz Mehdiyevlə bərabər hallanmalıdır?..."

xudo.jpg

Xızı bələdiyyəsinin sədri icra başçısı tərəfindən sərt təpki aldı.

Bu barədə dosye.org-a etibarlı mənbəmiz məlumat verib. Mənbəmizin məlumatına görə, Xızı RİH Başçısı Xəzər Aslanov tədbirdə bələdiyyə sədri Xalıq Qasımova bəzi suallar ünvanlayıb. Məlumatda oda vurğulanır ki, icra başçısı bələdiyyə sədri X. Qasımova üzünü tutaraq” Sizə görə nə üçün mənim adım Ramiz Mehdiyevlə bərabər hallanmalıdır? Necə torpaqları satmısınız elə də yoluna qoyun”. Onuda nəzərinizə çatdıraq ki, Xızı bələdiyyəsinin keçmiş sədri hal-hazırda rayonda Mədəniyyət və Turizm Şöbəsinin müdiri Mövsüm Bağırov və hazırkı bələdiyyə sədri Xaliq Qasımovun qanunsuz əməlləri Ədliyyə Nazirliyində, Baş Prokurorluğda, Korrupsiyaya Qarşı Mübarizə İdarəsində və Ekalogiya və Təbii Sərvətlər Nazirliyində araşdırılır.

Məlumat üçün bildirək ki, adı hallanan şəxslər vəzifə səlahiyyətlərindən sui istifadə edərək qanunsuz torpaqların alqı-satqısına imza atıblar. Altıağac Milli Parkının satıldığı və Zülfüqarlı qardaşlarına Xızı rayonunda meydan verilməsi yazdıqlarımızı bir daha təsdiqlədi. Elə bu səbəbdən dosye.org saytında hər iki şəxsin qanunsuz əməlləri barəsində geniş məlumatlar dərc edildi. Məlumatların doğru olub-olmadığını isə aidiyyətli qurumlar tərəfindən tam araşdırıldıqdan sonra bəlli olacaq.

Bir faktı qeyd edək ki, bəzi araşdırmalar məsələnin ciddiliyini və adı hallanan şəxslərin qanunsuz əməllərinin sübütü üçün kifayət edir. Əslində, məsələnin mahiyyəti bir neçə versiyanın ortada olduğuna işarə vurur. Birinci versiya ondan ibarətdir ki, rayonda torpaq alqı-satqısı icra başçısının icazəsi olmadan həyata keçirmək qeyri mümkündür. Baxmayaraq ki, Xızı rayon icra hakimiyyətinin səlahiyyətli nümayindəsi dosye.org-a açıqlamasında bildirdi ki, icra başçısınin torpaqların alqı-satqısı məsələsində heç bir rolu yoxdur.

Tam səmimi etiraf edək ki, bu cür gülünc açıqlamalar ancaq özlərində inam yarada bilər. İkinci versiya ondan ibarətdir ki, icra başçısı öz adı hallanmasın deyə yuxarıda adı hallanan şəxsləri birmənalı olaraq torpaqların qanunsuz alqı-satqısında onları günahkar hesab edir və qurban verməyə hazırlaşır. Əlbətdə ki, Xızı bələdiyyəsinin keçmiş sədri hal-hazırda rayonda Mədəniyyət və Turizm Şöbəsinin müdiri Mövsüm Bağırov və hazırkı bələdiyyə sədri Xaliq Qasımov icra başçının “dabrosundan” sonra Zülfüqarlı qardaşlarına Altıağac Milli Parkını satıblar.

Necə ola bilər ki, dövlətə və dövlətçiliyə qarşı çıxan şəxs qanunsuz yolla Altıağac Milli Parkını satın alıdı? Hər birimizə aydındır ki, müstəqilliyimiz əldə edildikdən sonra canla-başla dövlətə şərəflə xidmət edən PA rəhbəri cənab Ramiz Mehdiyev Zülfüqarlı qardaşları tərəfindən ölkə xaricindən hücüma məruz qaldı. Bütün bunlara baxmayaraq böyük cəsarət nümayiş etdirən R. Mehdiyev “qardaşlara” qanun çərçivəsində lazımı cavabı verə bildi. Bunları qeyd etməkdə məqsədimiz odur ki, hakimiyyət daxilində günü bu gündə arzuolunmaz şəxslər var.

Dövlətçiliyə xidmət edən şəxs heç bir zaman şəxsi maraqlar naminə dövlətin qanunlarını tapdaq altına atmaz. Eyni zamanda dövlətə və dövlətçiliyə xidmət edən hörmətli şəxsləri müdafiə etməlidir. Lakin Xızıda baş verən son hadisələr onu deməyə əsas verir ki, Xızı bələdiyyəsinin keçmiş sədri hal-hazırda rayonda Mədəniyyət və Turizm Şöbəsinin müdiri Mövsüm Bağırovu və hazırkı bələdiyyə sədri Xaliq Qasımovu nəinki PA rəhbəri Ramiz Mehdiyev, heç dövlətin qanunlarıda maraqlandırmır. Amma qeyd olunan qanunsuzluqlar Xızı RİH başçısı Xəzər Aslanovu dərindən düşündürməli idi. Görünür, icra başçısı tənqidi yazılarımızdan sonra sanki qəflət yuxusundan ayılıb.

Ötən yazılarımızda qeyd etmişdik ki, Xızı bələdiyyəsinin keçmiş sədri hal-hazırda rayonda Mədəniyyət və Turizm Şöbəsinin müdiri Mövsüm Bağırovun arxalandığı şəxs barəsində məlumat veriləcək. Əldə etdiyimiz dəqiq məlumatlara görə, həmən şəxs Baş prokuror yanında Korrupsiyaya qarşı Mübarizə Baş İdarəsində yüksək vəzifədə çalışır. Qohumluq əlaqələrini nəzərə almayan dövlət qulluqçusu məsələyə müdaxilə etməyəcəyini bildirib. Bütün bunları nəzərə alıb adını açıqlamırıq. İnanırıq ki, məsələ ən yüksək səviyyədə araşdırılacaq və hüququ qiymət veriləcək. Araşdırmalarımız davam edir....

Dosye.org

 

Allahşükür Paşazadə: "Gəncədəki təxribatların törədilməsində Ermənistanın və onların köməkçilərinin əli var"

allah.jpg

"Gəncə həmişə bizim diqqət mərkəzimizdədir. Çünki Gəncə İmam Hüseyn şəhəridir. Gəncədə baş verən sonuncu hadisələr bizi çox məyus etdi. Bu hadisələri biz terror aktı kimi qiymətləndiririk".

"Report"un Qərb bürosunun xəbərinə görə, bunu Gəncə İmamzadə Dini Kompleksində Qafqaz Müsəlmanları İdarəsinin (QMİ) təşkilatçılığı ilə keçirilən müşavirədə QMİ sədri Şeyxülislam Allahşükür Paşazadə deyib.

"Bu, düşünülmüş şəkildə ölkədəki sabitliyi, əmin-amanlığı pozmaq, dövlətə və dövlət xadimlərinə qarşı təxribatdır. Bu təxribatların törədilməsində Azərbaycanın qonşu dövlətlərinin, xüsusən də Ermənistanın, onların yoldaşlarının, əlaltılarının və köməkçilərinin əli var. Təbii ki, bu terror hadisələrinin təşkilatçıları Azərbaycanın beynəlxalq arenda nüfuzunun yüksəlməsini, siyasi, iqtisadi və digər sahələrdə qazanılan uğurlarını gözü götürməyən qüvvələrdir", - A.Paşazadə əlavə edib.

Dosye.org

Nərimanov Rayon İcra Hakimiyyətində hesabat yığıncağı keçirilib

qazi.jpg

Nərimanov rayonunun sosial-iqtisadi inkişafının 2018-ci ilin birinci yarısının yekunlarına və qarşıda duran vəzifələr”ə həsr olunmuş Nərimanov Rayon İcra Hakimiyyəti başçısı yanında Şuranın iclası keçirilib.

İyulun 13-də “Nərimanov rayonunun sosial-iqtisadi inkişafının 2018-ci ilin birinci yarısının yekunları və qarşıda duran vəzifələr”ə həsr olunmuş Nərimanov Rayon İcra Hakimiyyəti başçısı yanında Şuranın iclası keçirilib.

Tədbirdən öncə rayon rəhbərliyi və rəsmi qonaqlar İcra Hakimiyyətinin inzibati binasının foyesində xalqımızın Ümummilli Lideri Heydər Əliyevin büstü önünə tər gül dəstələri qoyaraq Ulu Öndərin əziz və parlaq xatirəsini ehtiramla yad ediblər.

Rayonun rəhbərliyi, Milli Məclisin deputatları, rayonda fəaliyyət göstərən idarə, müəssisə və təşkilatların rəhbərləri, həmçinin rayon ictimaiyyəti nümayəndələrinin qatıldığı tədbiri giriş sözü ilə açan Rayon İcra Hakimiyyətinin başçısı Abdin Fərzəliyev cari ilin iyul ayının 8-də Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlətimizin başçısının geniş nitq söyləyərək dünyada baş verən qlobal iqtisadi böhrana baxmayaraq, aparılan ardıcıl və köklü iqtisadi islahatlar nəticəsində ölkəmizdə sosial-iqtisadi inkişafın bütün sahələrində əldə olunmuş nailiyyətlərdən ətraflı söz açdığını və qarşıda duran vəzifələri diqqətə çatdıraraq, həmin vəzifələrin həlli ilə bağlı öz dəyərli tapşırıq və göstərişlərini verdiyini bildirib.

A.Fərzəliyev ölkə rəhbərinin Bakı şəhəri və ətraf qəsəbələrin sosial-iqtisadi inkişafına dair təsdiq etdiyi müvafiq proqramlar, imzaladığı sərəncamlar, verdiyi tapşırıqların paytaxtımızın aparıcı rayonlarından olan Nərimanov rayonunun da sürətli inkişafına, infrastruktur sahələrinin bərpası və genişləndirilməsinə, sosial-mədəni obyektlərin yaradılmasına, bununla da, əhalinin rifah halının yaxşılaşdırılmasına, layiqli həyat tərzinin təmin olunmasına müstəsna töhfələr verdiyini, respublikamızda aparılan uğurlu sosial-iqtisadi siyasət nəticəsində görülən işlərin hazırda Nərimanov rayonunda da uğurla davam etdirildiyini diqqətə çatdırıb.

Hesabat məruzəsində rayon iqtisadiyyatının əsasını təşkil edən sənayenin mühüm iqtisadi göstəriciləri barədə məlumat verilərək, ilin birinci yarısının yekunlarına görə sözügedən sahənin dinamik inkişafının davam etdirildiyi və bu müddət ərzində xidmətlər də daxil olmaqla 1 milyard 932,5 milyon manatlıq məhsul istehsal olunaraq, ötən ilin müvafiq dövrünə nisbətən 34,4 faiz artım sürətinin əldə edildiyi, istehlakçılara 1 milyard 827,3 milyon manatlıq və ya bütün sənaye məhsulunun 128,1 faizi qədər sənaye məhsulunun göndərildiyi, eləcə də birinci yarımil ərzində çox hissəsi istehsal və tikinti sahəsinin inkişafına sərf edilmiş 100,1 milyon manatlıq investisiyanın yatırıldığı, ilin əvvəlindən 2495 daimi iş yerlərinin açıldığı vurğulanıb.

Hesabat dövrü ərzində rayonda qeyri-neft sektorunun və sahibkarlığın inkişaf etdirilməsi, tikinti ilə bağlı mühüm layihələrə investorların cəlb edilməsi, ilk növbədə əhalinin məşğulluq səviyyəsinin qısa vaxt ərzində artırılması üçün tikinti sektorunun inkişaf etdirilməsi ilə bağlı Rayon İcra Hakimiyyətinin təklifləri nəzərə alınaraq, Nazirlər Kabineti tərəfindən qəbul olunmuş, rayon ərazisində abadlıq quruculuq işlərinin davam etdirilməsi, qəzalı vəziyyətdə olan binaların sökülərək yerində müasir tələblərə uyğun yeni binaların tikilməsi və həmin binalarda yaşayan sakinlərin mənzil-məişət şəraitinin yaxşılaşdırılması ilə bağlı qərardan irəli gələn vəzifələrin mərhələli həlli istiqamətində işlərin davam etdirildiyi bildirilib. Belə ki, rayon ərazisində hazırda “Pilot layihə” çərçivəsində 23 ünvanda tikinti işləri həyata keçirilir ki, bunlardan 2 ünvanda inşaat işləri artıq başa çatdırılmış, mənzillərdə təmir işləri aparılır, 7 ünvanda əhalinin köçürülməsi və evlərin sökülməsi işləri, 7 ünvanda isə layihələndirmə işləri həyata keçirilir.

Ölkə xaricində həyata keçirilən geniş layihələrdən danışılarkən, Azərbaycan Respublikasının Prezidenti cənab İlham Əliyevin göstəriş və tapşırığına əsasən, Heydər Əliyev Fondunun təşəbbüsü və dəstəyi ilə cari ilin may ayının 31-də Heydər Əliyev Fondunun vitse-prezidenti Leyla Əliyevanın iştirakı ilə Rusiya Federasiyasının Həştərxan vilayətində Azərbaycan Biznes Mərkəzinin təntənəli açılışı mərasiminin olduğunu, həmçinin ötən ilin dekabr ayında qarşılıqlı olaraq Azərbaycan Biznes Mərkəzinin layihəsi əsasında Nərimanov rayonu ərazisində Həştərxan vilayəti tərəfindən inşa ediləcək Həştərxan İş Mərkəzinin təməlqoyma mərasiminin keçirildiyi qeyd edilərək, bu layihələrin reallaşmasının respublikamızda istehsal olunan məhsulların Rusiya ərazisində yayılmasının təşkili üçün geniş imkanlar açacağına və bunun da nəticə etibarı ilə ölkəmizin ixrac potensialının artırılması, “Made in Azerbaijan” brendinin xarici bazarlarda təşviqi, eləcə də sahibkarlığın, qeyri-neft sektorunun və ümumilikdə ölkə iqtisadiyyatının inkişafına səmərəli töhfə verəcəyi xüsusi vurğulanıb.

Eyni zamanda, ötən yarımil ərzində rayon rəhbərliyi tərəfindən 2294 nəfər vətəndaşın iştirak ilə keçirilmiş 11 səyyar görüş və qəbullar zamanı edilən 82 nəfərin müraciətinin dinlənilərək öz müsbət həllini tapdığı, həmçinin “Qaynar xətt-1643” xidmətinə daxil olmuş 388 müraciətdən 175-nin tam həll olunaraq, digər müraciətlərlə bağlı vətəndaşlara müvafiq izahatların verildiyi qeyd edilib.

Tədbirdə çıxış edən 7 saylı uşaq yoluxucu xəstəxanasının baş həkimin müavini Natavan Cəfərova, Rayon Ağsaqqallar Şurasının sədri Miri Həsənov rayonda geniş vüsət alan abadlıq-quruculuq işləri barədə öz fikirlərini bildirərək, rayon sakinlərinin problemlərinin həlli istiqamətində görülən işlərdən məmnunluq ifadə ediblər. Onlar dövlətimizin başçısının rəhbərliyi altında ölkə həyatının bütün sahələrində əldə edilmiş nailiyyətlərdən söz açaraq, aparılan sosial-iqtisadi islahatlar nəticəsində ölkəmizin yeni inkişaf dövrünə qədəm qoyduğunu və hesabat dövründə görülən işlərin bundan sonra da uğurla davam etdiriləcəyinə əminliklərini bildiriblər.

Hesabat iclasının yekununda A.Fərzəliyev Nərimanov rayonunun sosial–iqtisadi inkişafı, əhalinin həyat səviyyəsinin yaxşılaşdırılması, geniş abadlıq və quruculuq işlərinin aparılması, onlara göstərilən kommunal və digər xidmətlərin səviyyəsinin yüksəldilməsi və s. istiqamətdə 2018-ci ilin birinci yarısında görülən işlərin gələcəkdə də uğurla davam etdiriləcəyini vurğulayıb.

Dosye.org

Xəbər Lenti



 

 

Рейтинг@Mail.ru

Ünvan: Azərbaycan Nəşriyyatı Dosye.org redaksiyası. Baş direktor Elman Nigaran. tel: (012) 409 20 21
email: dosye.org@mail.ru
Saytdakı materialların istifadəsi zamanı istinad edilməsi vacibdir. Məlumat internet səhifələrində istifadə edildikdə hiperlink vasitəsi ilə istinad mütləqdir.