Naxçıvanı bu gün FETÖ-çular İDARƏ EDİR – Həm də Türkiyənin qulağının dibində…

Naxçıvanı bu gün FETÖ-çular İDARƏ EDİR – Həm də Türkiyənin qulağının dibində…

Naxçıvan Şəhər İcra Hakimiyyəti başçısının sabiq müavini Səfər Əhmədov tutduğu vəzifədən qanunsuz şəkildə azad olunduğunu iddia edir. Sabiq müavin bununla bağlı TNS-ə müraciət edib. Mövzunun əhəmiyyətini və həssaslığını nəzərə alaraq həmin müraciəti ictimailəşdirməyə qərar verdik. Səfər Əhmədovun redaksiyamıza göndərdiyi məktubu təqdim edirik:

“Naxçıvan Şəhər İcra Hakimiyyətinin sabiq başçısı Mirsənani Seyidov 1 avqust 2023-cü il tarixdə, saat 12:30-da məni qəbuluna çağıraraq, Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəflinin təcili və qəti göstərişinə əsasən, başqa vəzifəyə təyin olunacağımla bağlı sərəncama götürüldüyümü (ərizəm alınmadan), tutduğum vəzifəyə Əhməd Zöhrab oğlu Vəliyevin (həmin gün saat 15:00-da akt zalında Ə.Vəliyev səlahiyyətli mümayəndənin müavini Samir Seyidəhmədli tərəfindən kollektivə təqdim olunmuşdur) təyin olunduğunu bildirdi. Mən bu məsələyə qəti şəkildə etiraz edərək bildirdim ki, 22 illik stajı olan dövlət qulluqçusunu xəbərdar etmədən, səbəb olmadan necə bir dəqiqə ərzində işdən azad edə bilərsiniz!? Bu, absurddur. Axı mənim heç bir nöqsanım yoxdur!?

Mirsənani Seyidov yaxın vaxtlarda mənim müvafiq bir işlə təmin olunacağıma dair səlahiyyətli nümayəndənin söz verdiyini bildirərək, iş otağımdakı şəxsi əşyalarımı götürməyimi tapşırdı. Həmin vaxt Mirsənani Seyidov mobil telefonunu çıxararaq, səlahiyyətli nümayəndənin müavini Samir Seyidəhmədlinin “WhatsApp” vasitəsilə göndərdiyi Əhməd Vəliyevin şəxsiyyət vəsiqəsinin surətini mənə göstərərək, Fuad Nəcəflinin tapşırığı əsasında Əhməd Vəliyevin artıq sərəncamının hazırlandığını və saat 15:00-da onun kollektivə təqdim olunacağını bildirdi. Mirsənani Seyidov Ə. Vəliyevi şəxsən tanımadığını, onun Bakı şəhərindən gətirildiyini, sərəncamının “WhatsApp”dan göndərilən şəxsiyyət vəsiqəsinin surətinə əsasən verildiyini dedi. Mən şəxsi əşyalarımı götürərək İcra Hakimiyyətinin inzibati binasını birdəfəlik tərk etdim. Azərbaycan Respublikası Prezidentinin 17 noyabr 2023-cü il tarixli müvafiq sərəncamı ilə Mirsənani Seyidov tutduğu vəzifədən azad edilib. Mirsənani Seyidova dəfələrlə etdiyim müraciətlərim cavabsız qalıb, mənə yalan vədlər verilib.

Son 7 ay ərzində səlahiyyətli nümayəndə Fuad Nəcəfliyə, onun müavini Samir Seyidəhmədliyə məni işlə təmin etmələri barədə 50-yə yaxın elektron müraciətlərim cavabsız qalıb. Xüsusilə vurğulamaq istəyirəm ki, son illər müxtəlif dövlət orqanları tərəfindən aparılan audit yoxlamaları zamanı fəaliyyətimdə heç bir nöqsan aşkarlanmayıb. Bildirirəm ki, həyatım boyu Ulu Öndərimiz Heydər Əliyevin ideyalarına şərəflə xidmət etmişəm və bu gün də edirəm. Ümummilli Liderimizin yolunu uğurla davam etdirən möhtərəm Prezidentimiz İlham Əliyevin son 20 ildə Azərbaycana rəhbərliyi dövründə tutuduğum vəzifələrə layiq olmağa çalışmış, vətənimizə və dövlətimizə sədaqətlə xidmət etmişəm. Dövlətimizin verdiyi əməkhaqqı məni hər zaman qane edib. Daim zəhmətimlə yaşamışam. Şəxsi avtomobilim belə yoxdur.

Dörd balaca övladım var. Üçü məktəblidir (ikisi repetitor yanına gedir və 500-600 intervalında bal toplayırlar), biri isə dörd yaşındadır. Uşaqlar artıq hazırlıq kurslarından məhrum olub, çünki ödəniş etmək imkanım yoxdur. Hər ay “Kapital Bank”a 760 manat ipoteka krediti, “Naxçıvan Bank”a isə 380 manat istehlak krediti öhdəliklərim var. Yeganə gəlirim müharibə iştirakçılarına verilən 80 manat Prezident təqaüdüdür.

Hesab edirəm ki, dövlətimizə sədaqətlə xidmət edən bir dövlət qulluqçusunu bilərəkdən bu vəziyyətə salmaq, heç bir səbəb olmadan onun 22 dövlət qulluğu stajının (gələcəkdə mənim pensiya təminatına da mənfi təsir göstərir) üzərindən bir qara xətt çəkmək heç kimə xeyir gətirməz. Hansısa bir dövlət məmurunun vəzifəsindən sui-istifadə edərək belə bir qərar qəbul etməsi vətəndaşların dövlətimizə olan inamını sarsıdır. Bütün bu baş verənlərə dözə bilmirəm. Mən artıq kiminsə səhvi və səhlənkarlığı üzündən intihara sürüklənirəm. Yeddi ay səbəbsiz yerə maddi durumum ağır vəziyyətdə gözlədim. Daha səbrim tükənib, çünki ailəm həddindən artıq acınacaqlı durumdadır. Sizin vasitənizlə möhtərəm Prezidentimiz İlham Əliyevə, Birinci vitse-prezident Mehriban xanım Əliyevaya müraciət edir, hüquqlarımın bərpası, işlə təmin olunmağım, ailəmizin düşdüyü ağır vəziyyətdən çıxarılması üçün köməklik göstərmələrini xahiş edirəm”. Qeyd edək ki, Səfər Əhmədov hüquqlarının bərpası məqsədilə ölkəmizin hüquq-mühafizə orqanlarına və məhkəməyə də müraciət edib.

Bu arada ovqat.com-un yaydığı məlumata görə Naxçıvan şəhər İcra Hakimiyyətinin faktiki başçısı (rəsmən müavini) Əhməd Vəliyev srağagün axşam təcili Bakıya çağrılıb. Bu təcili dəvətin səbəbi bilinmir. Amma dünən axşamdan Naxçıvan MR-da yaşanan gərginliklər Əhməd Vəliyevin niyə Bakıya çağırılmasına qismən aydınlıq gətirir. İddialara inansaq, ötən axşam Prezidentin Naxçıvan üzrə səlahiyyətli nümayəndəsi rayon icra başçılarına zəng edib Muxtar Respublikadakı vəziyyətlə bağlı onları bərk danlayıb. Səhər açılan kimi isə Naxçıvan şəhər İcra Hakimiyyətinin Ticarət və Xidmət Departamentinin direktoru Əli Vəliyev son zamanlar iaşə obyekti açmaq məqsədi ilə ona müraciət edən sahibkarları yanına çağırıb bundan sonra onların müraciətinə şəhər meriyasının Memarlıq və tikinti şöbəsinə yeni müdir təyin olunan Qabil Abbasovun baxacağını bildirib və özünə təqdim edilən sənədləri sahibkara qaytarıb.

İnformasiya qaynağımız həm səlahiyyətli nümayəndə Fuad Nəcəflinin icra başçılarına zəng etməsini, həm Əhməd Vəliyevin təcili Bakıya çağrılmasını, həm də meriyanın Ticarət və Xidmət Departamentinin direktoru Əli Vəliyevin sahibkarlardan topladığı sənədləri özlərinə qaytarmasını bir amillə əlaqələndirir. Onun iddiasına görə, ötən ilin 28 iyulunda Naxçıvan şəhər İcra Hakimiyyətinin Ticarət və Xidmət Departamentinin direktoru təyin olunan Əli Vəliyev işində ciddi dönüş yarada bilməyib. Yenə “xan” dövründəki qaydalar eynilə davam edir; aldığı obyektdə pəncərəni qapı ilə əvəz edən və ya yeni iş yeri açmaq üçün Sərəncam almaq istəyən sahibkarlardan 25-30 min manat civarında “şirinlik” alınırmış və s. Bu da bəzi sahibkarların etirazına səbəb olub və onlar Bakıya şikayət ediblər. Bakıdan gələn sərt tənqid nəticəsində xüsusi nümayəndə icra başçılarına zəng edib və onları danlamaqla işini yekunlaşdırıb. Başqa sözlə, Bakı “canişin”i danlayıb, “canişin” də icra başçılarını. Bununla kifayətlənməyən paytaxt isə Naxçıvan şəhər İcra Hakimiyyətinin faktiki başçısını görüşə çağırıb.

Maraqlıdır ki, Naxçıvanın faktiki meri Əhməd Vəliyev əslində legitim mer deyil. Yəni onun hansısa sərəncama qol çəkmək ixtiyarı yoxdur. Nəticədə sahibkarlardan “şirinlik” alınaraq onlara sərəncam əvəzinə söz verilirmiş. Di gəl ki, Bakıya edilən şikayətlər bütün planları alt-üst edib. Sərəncam əvəzinə söz verilən sahibkarların 40 nəfər civarında olduğu bildirilir. Digər iddialara görə, Naxçıvanın faktiki meri “çiçəyi burnunda” məmurlardandır. O, bir neçə gün əvvəl bu vəzifəyə təyin olunub və yeni iş yerinə özü ilə bərabər əlavə 4 nəfər də gətirib: İsa Allahverdiyevi Hüquq Şöbəsinə müdir; Qabil Abbasovu Memarlıq ve tikinti şöbəsinə müdir; Sadiq Salahlını Ümumi şöbəyə müdiri; Bağır Abbasovu 1 saylı Mənzil İstismar Sahəsinə (Jek) müdir.

Dərd burasındadır ki, bu möhtəşəm “beşliy”in hamısı Fətullah Gülənin bir vaxtlar Naxçıvanda fəaliyyət göstərən orta məktəbinin məzunlarıdır. Odur ki, Naxçıvan şəhər meriyasında işləyənlər arasında “FETÖ-çülər iş başına gəldi” dedi-qoduları yayılıb.
aztoday.az

COMMENTS