“Seltik”lə oyun bizim üçün gözəl tamaşa olacaq” – “Rudar”ın baş məşqçisi

“Seltik”lə oyun gözəl tamaşa və işimizin zirvəsi olacaq. Ancaq bu haqda danışmaq çox tezdir. Çünki bizi “Qarabağ”la çətin cavab görüşü gözləyir. Sadəcə, “Seltik”lə oyun barədə soruşdular və buna görə də cavablandırdım. Hazırda bütün diqqətimizi “Qarabağ”la oyuna yönəltmişik”.

Qol.Az-ın məlumatına görə, bu sözləri “Rudar”ın baş məşqçisi Mirko Mariç Monteneqro mətbuatına açıqlamasında deyib.

Çempionlar Liqasının II təsnifat mərhələsinin cavab görüşü çərçivəsində “Qarabağ”la qarşılaşacaq “Rudar”ın çalışdırıcısı Azərbaycan çempionunun bu matçın da favoriti olduğunu bildirib: “İlk oyunda olduğu kimi “Qarabağ” yenə cütün favoritidir. Bakıda məqsədimiz qol buraxmamaq idi ki, buna da nail olduq. Cavab görüşündə də tələsməyəcəyik. Çünki evdə qol buraxmaqdansa, hesabın açıqlamaması daha sərfəlidir. Səbirli, məsuliyyətli və intizamlı oynasaq, mərhələni keçə bilərik”.

Qeyd edək ki, iyulun 22-də keçiriləcək “Rudar” – “Qarabağ” matçı Bakı vaxtı ilə saat 23:45-də başlayacaq.